انتظار / زینب فرجی
سنی سئویرم،
دوداقلاریمدا آدین یانیر،
گولوشلریمده سولغون گؤرکم
دویغولاریمدا اؤزلم دوغولماقدادیر.
گؤزلرینی آچ
ایچیمه سئوگی ساچ
ایکی گون قالیر دونیامیزدان!
سئوگی کؤچه‌جک
حسرت قالاجاق.
سنی یئل‌لر باغچاسینا گؤندرمیشم
مکتوب‌لاری آلسان قاییت کؤنلومه!
گئجه‌لر داریخماق بوغازیمی سیخیر.
تزه آیاق قابی‌لاریمی وئرسئیدیم سنه
پئشمان اولمازدیم.
بیلیرم
گونش چیخاجاق
قارانلیق کؤچه‌جک
قارلار اَرییه‌جک گونش اوزاقلاردا باتان زامان
آزادلیق پنجره‌سی باغلاناجاق
سئرچه‌لر اؤزلرینی چیرپاجاق باش ـ گؤزومه.
یورولدوم یوللارا باخماقدان
سن گلیب چیخمادین.
سانکی
ستلجم توتموشام دؤرد دیوار آراسیندا،
دونیادان خبرسیزم.
کاش
بیری اولاردی
اؤلوم بیلدیریمی قزئته‌لره وئرردی
بلکه خسته‌لر سئوینردی.
بیزیم کی
سئوگیمیزدن اوزوموز گولمه‌دی؛
یامان اودوزدوق بو سئودادا!
