آدرس
سحر خیاوی
بیر دنیز وار اوزاقلاردا
یولو بوزقیرلیقدان کئچَر
هاچالی یوللاردان
قورخولو گدیک‌لردن
سئورسنسه اونا قوووشماغی
دمیر چکمه گئیمه‌لیسن
دمیر چلیک گؤتورمه‌لی؛
مله‌شیر قیزمار گونَش آلتیندا آدامجیل ایلانلاری؛
یولون اوجونو توت گَل؛
سونوندا بیر دنیزه یئتیشه‌جکسن،
آلخی-بالخی وورور دورولوغو،
یاللی گئدیر قیرمیزی بالیقلاری،
ساحیله باشین چیرپاندا دلی‌سوو دالغالار،
آت ماوی اتگینه اؤزونو،
سماع رقصی ائت بورولغاندا،
چکیل دنیزین تکینه،
سئحیرلی قارانلیقلاردا،
بیر سو پریسی سنی گؤزله‌ییر اوردا،
ماوی باخیشلارینی
سیجاق ال‌لرینی
ایللردیر یاندیریر شام یئرینه یاشیل بارماقلارینی،
مکتوب یازیر ناققا دریسینه تانینماز عنوانلارا،
بورگه‌له‌ییب قویور شوشه‌لره،
آتیر دنیزه،
یوخسا باغلاییر قیها چکن مارتی‌لارین اوزون قیچلارینا،
پیچیلداییر سئوگی شعر‌لرین کولک‌لرین قولاغینا،
اولمایا سن…
سن ایللر گؤزلری یول چکن ایتگین سئوگیلیسی‌سن می؟!
خوش گلیبسن،
گل سیغین قوینونا،
باشینی قوی سئرچه اوره‌یی کیمی چیرپینان سول دؤشو اوستونه
یاشیل گؤز‌لرین قیغیلجیم ساچسین؛
فنارسیز گئجه‌لرینده
آیدین یوز کابوسلو، ایسلاق رویالارینی
گل یولچولارا یول گؤسترن دنیز چیراغی اولسون پارلاق گؤز‌لرین؛
گل او قیزین هر گونون آیدین ائتگینن سئوگیلیم!!
