سن کی وارسان
حیدر عبادی

سن کی وارسان
دونیا باشیما دولانیر
کوچه‌لر آردیمجا گلیر
آددیم- آددیم ایزله‌ییرلر آددیم‌‌لاریمی.
سن کی وارسان
اولدوزلار گؤز وورور گؤز‌لریمه
آی ایشیق دولاییر
بولادلار اورپک‌‌‌لرین گؤتورور
سنله‌شیر گئجه‌‌لریم.
سن کی وارسان
دلی‌لیک ائدیرم اؤزومو
بوتون گئریده قالان گون‌‌لرین آجیغینا
باش دوندرمیرم ده
آردیمجا ملر قالسین او گونلر ملر- ملر
و سیز
ای منه دلی دئین‌لر!
بیلمزسیز کی
من
داغ‌‌لارین ماتیکلی دوداق‌‌لارین اؤپورم
چای‌‌لارین آغلار گؤز‌‌لرینی
حسرت‌‌لرین الیندن دوتورام
کدر‌لری قوجاقلاییرام
و یئتیم غم‌‌لرین
باش ساغلیغینا گئدیرم.
سیز بیلمزسیز کی ندن
گولوش‌لری حسرت قویورام دوداق‌لاریما
سولماسین بیر گول ده، دئیه
قاندال‌لاری قول‌لاریما سارییرام
تیکان‌‌لارین ساغلیغینا
ائله ده
گول دریرم ایلان‌‌لارین یووا‌‌لارینا
یوخو‌لاریما گلسینلر
یاتاغیمدا قول- بویون قیوریلاق گئجه‌لر
بیر اوپوش وئرسینلر قیطان دوداق‌لاردان
سیز کی
ایلان دوداغی اؤپمه‌میسیز
دلی‌لیک دویمایان‌لار
بیلمزسیز
شاعرلیک ندیر ؟
بیلمزسیز.
سن کی وارسان
دونیا باشیما دولانیر
نه دئمکدیر؟
سیز….
۹۷/۴/۱