آراز قورخوسو وار
منوچهر آزاد فانی

یاسا باتمیش قارا گؤزلرده آراز قورخوسو وار
و گلین‌لیکده بونون یوخسا جاهاز قورخوسو وار
دولاشیق‌لیغدا هله ساچلی ساچاق هؤرمه‌لری
آل یاناق‌لاردا یامان سئوملی ناز قورخوسو وار
«ائل گوجو سئل گوجو» دئرلر بو مثل‌دن هادیر اول
ائلی گوجلویدو یاتار سئل ده، بیر آز قورخوسو وار
آچگینان مسجدی بتخانی‌یه دؤندرمه آ شیخ
بللی‌دیر بیردا مسجدلرده نماز قورخوسو وار
آختاریب کیمسه حقیقی چاتار عشقین کؤکونه
اورا بیر یئردی اینانمام کی مجاز قورخوسو وار
بیر گونو اؤلسم اگر تاختا تابوت‌دا گتیرین
منده جان قورخوسو اولمازدی قوراز قورخوسو وار
یئرده یوخ، گؤی ده منی دفن ائله‌یین چون کی دئدیم
یاسا باتمیش قارا گؤزلرده آراز قورخوسو وار
۱۳۹۶/۱۲/۲۶