او گئتدی … گلمه‌دی
محمدرضا مقدسی
بعضا بیر اینیلتی، بیر ماهنی، بیر سس
توللاییر انسانی، آی آ، اولدوزآ !
بعضا ده بیر چَپَر، بیر سینیق قفس
سورویوب آپاریرررر … قوشور آرازآ !
دیریلدیر اؤلومجول خاطیراتی آه !
بیر چیچک نفسی، آیدین بیر سحر.
بوتون کئچه‌جکله، گلیریک اورجاه !
حسرتدن غم دوغار، آرزیدان کَدَر.
دونن بیر ایپک سس، کؤنلومه آخدی
دیرچَلدی ذهنیمده، اوشاقلیق بیردن.
دونن بیر سس منی یاندیریب یاخدی
اولدو یاغی، اولدو یولومو کَسَن !
دونن بیر تک بولاق قاینادی جوشدو
قایالار باغریندا، داغلار باغریندا !
بوتون چول – باییرا، بایاتی قوشدو
باغچالار باغریندا، باغلار باغریندا !
دونن بیر سَرت کولک، اؤز قوجاغیندا
آپاردی ساوالان، سهنده منی.
اَسریمیش گونشین سرخوش چاغیندا
یئتیردی شَهَردن، آه کنده منی !
مدرسه اؤنونده وداعلاشدیق بیز
اوشاقلیق قوللارین سالدی بوینوما !
اوخشادی گوز ائوین بنؤوشه، نرگیز
خاطیره‌لر بیر _ بیر گیردی قوینوما !
درسیمیز باشلاندی …، معللیم آغا
سئویب، سئویلمه‌یی بیزه اویره‌دیر !
یورغون باخیشلاری دؤنور بولاغا
اوره‌یین پایلاییر، هامییا بیر _ بیر !
ناغیللار سؤیله‌نیر قورتدان تولکودن
دره دن یوکسه‌لیب داغا یئنیریک !
بورویور کؤوشنی کولک، دومان، چن
کوراوغلو اولوروق، قیرآت مینیریک !
مشقیمیز صداقت، سئوگی، محبت
ظالیمین اؤنونده جوشوب کوکرمک.
یالتاغا مین قارقیش، آلچاغا نیفرت
مشقیمیز یاسمن، یارپیز، گول چیچک !
مشقیمیز بیر قاطار دورنا، قارانقوش
نانالی، مرزه‌لی، ریحانلی داغلار !
عدالت، آزادلیق، بیرلیک، قورتولوش
چنلی‌بئل یوردونا آخان بولاقلار !
معللیم اؤیره‌دیر حساب درسینی
بئش قوزو، بئش قویون، قوجاقلاشیرلار.
بیر بیر تانییریق، یوزلویو، مینی
سورولر یاماجدان آشیب، داشیرلار !
تکه‌لر آیریلیر قویون قوزودان
تزه دن بؤلوروک بؤلوشدوروروک.
سونرا بیرده قاتیب اونلاری باشدان
ساتیریق، سوویریق، قاه قاه گولوروک !
آللاهین یئریندن سوروشوروق بیز،
سینیق اورکلرده آرایین دئییر !
گؤیلرده گزمه‌یین، ائنین یئره سیز
او دوزلوکده، دوزده، عدالتده‌دیر !
گؤرسه‌دیر تانرینی، قوش آوازیندا
بیر کیچیک چیچه‌یین تبسّومونده !
آنا لایلاسیندا، اوشاق نازیندا
گؤرسه‌دیر ایشیقدا، گورسه‌دیر گونده !
بولاق ایمکله‌ییر، داغ قوجاغیندا
باش قویوب چینینه بیر یارپیز کولو !
دویونجا دولاندیق تانری باغیندا
ایندی قاییتمیشیق گلیریک یولو … !
بو گون جومآخشامی، صاباح جومادیر
شنبه‌یه چاتماغا تله‌سیر اورَک !
بیر گون بیر ایل کئچیر شنبه یئتیشیر
جادّه‌یه قاچیریق اَلده گول چیچک !
ماشینلار اؤتوشور یئل کیمی آنجاق
معللیم آغامیز نه دن گلمه‌دی !؟
کنده گلنلردن دوتوروق سوراق
نییه گلمه‌دییین کیمسه بیلمه‌دی !!
او گئتدی، گلمه دی ! نئچه گون سونرا
بیر اَلی چانتالی ماشیندان اَندی !
_ آغانیز سفرده، دورمایین یولدا
او، تازا معللیم … تانیمیر کندی !
آغامیز سفردن هاچان گله‌جک ؟
هرگون سوروشوردوق، خانیم معللیم
سوزوردو گوز آلتی بیزی مارال تک
دئییردی بیلمیرم، بیلمه‌ییر هئچ کیم !
“میر نصیره” نذیر دئدیک، گلمه‌دی !
زَمی‌لر بیچیلدی کؤچدو دورنالار.
او گوندن دویغوموز، ایلمه- ایلمه دی
اولاشدی داغلاردا، یئنه کولک _ قار !
آی لار کئچدی، بیرگون آتام شَهَردن
بیر صاندیق آلمیشدی، سول بوجاغیندا .
معللیم آغانین شکلینی بیردن
گؤردوم بیر درگیؤنین ایلک واراغیندا!
ائله باغیردیم کی آنام داشلاندی
اوره‌ییم یئریندن آز قالدی چیخسین.
کؤنول کومه‌سینده چلچراغ یاندی
آغلادیم شووقدن، آه خیسین، خیسین!
پاییز کیمی احوالیمیز پوزولوب
سنسیزلیک بئزدیریب بیزی دونیادان !
یولونو گؤزله‌مک بیر عادت اولوب
آیریلیق یاماندیر، یاماندیر، یامان !
باشینا دولانیم، قادانی آلیم
مهربان گؤزونه، گؤزلریم قوربان.
یامان سنسیزله‌ییب سورغوم سوآلیم
مردلیک اؤلکه‌سینه کؤرپولر سالان!
دانیشدیم شکیلدن باخان گؤزلرله
کؤکسومه چیچکلر گوللر اَکیلدی !
اوخودوم درگی ده، اوخودوم بئله:
“امنیَّت دوشمانی دارا چکیلدی !”
