هر نه دن يازيرام، سندن دانيشير
شیدا نونهال(خزر)
من سنه گوونديم،سن بنؤشه‌نه
بيليرسن عزيزدير، سئون سئونه
اود دوتوب يانسامدا باغريندا يئنه
ايچيمده سيزيلتي سينيردان آشير
هر نه دن يازيرام، سندن دانيشير.
سارماشيق بولبولون باغرين ائشنده
اينجه بنوشه‌لر بنده دوشنده
دؤزومون ذيروه سين زامان دئشنده
اوره ييم كؤوره لير گؤز ياشيم داشير
هرنه دن يازيرام، سندن دانيشير.
آدامليق چاييندا بوغولسادا ايز
دوشونجه كدرله اولسا ديز به ديز
ليلله‌نمز دالغاسي كوكره ين دنيز
يالچين قايالاري ميلله‌نير داشير
هرنه دن يازيرام، سندن دانيشير.
خزره چئوريلير اوره ييم، هردن
سئومه‌رم باشيندا نه دومان، نه چن
من سني اونودا بيلميرم نه دن؟
قوينونا كؤرپه تك قولوم ساريشير
هرنه دن يازيرام، سندن دانيشير.