نه ایسته‌ییرم؟ / جعفر تانیش
چئویرن: ایشیق
ترجمه: ایشیق
ایشیق
00:00
00:00

نه ایسته‌ییرم؟
جعفر تانیش

نه اولدوز ایستیرم یئنی ناخیشلی،
نه ملک ایستیرم جئیران باخیشلی ،
اینسانا گرکلی، ان یاراشیقلی-
بیر اووج یاشاماق ایسته‌ییرم من.

ایسته‌مم عؤمرومه یوز ایل‌لیک چاریق،
ایسته‌مم حؤکم ائده منه قارانلیق،
دونیادا باریشیق، حربه‌سیز ارتیق-
بیر اووج یاشاماق ایسته‌ییرم من.

بیر آنیم گئتمه‌سین یوخا دویغوسوز،
گوندوزوم گئجه‌مه چاتماسین یالقیز،
دوشونه – دوشونه حیاتدا یالنیز –
بیر اووج یاشاماق ایسته‌ییرم من.

چؤللرده یئل قووار تملسیز کولو،
قاز هورر نیشانسیز بیر ائشه یولو،
وطنه، ائلیمه سئوینجله دولو –
بیر اووج یاشاماق ایسته‌ییرم من.

باهارلی، خزانلی باریت قوخوسوز،
چئوریمده تیکانسیز چپر توخوسوز،
بیر دؤنه اولسادا بیرجه قورخوسوز-
بیر اووج یاشاماق ایسته‌ییرم من.

آرزیلار باغیندا نئچه دیلک‌له،
قولومدان آسیلان تمیز امک‌له،
شلاله آخارلی آچیق اورک‌له-
بیر اووج یاشاماق ایسته‌ییرم من.

ایسته‌مم بیر گولون بوتاسین اه‌یم،
ایسته‌مم گئچمیشین حسرتین یئیم،
بو گئنیش دونیادا حققیمدیر دئیم-
بیر اووج یاشاماق ایسته‌ییرم من.

«تانیش» سئچیلمه‌ییر ایلیمدن آییم،
جومور قومسالیقا دنیزسیز چاییم،
بوتون ائل‌لریله بودور هاراییم-
بیر اووج یاشاماق ایسته‌ییرم من.

اشتراک گذاری در print
چاپ
اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email

نه ایسته‌ییرم؟ / جعفر تانیش

ایشیق
www.ishiq.net

آذربایجان ادبیات و اینجه‌صنعت سایتی