داریخما
رحیم کاویان

عاشیق اماندى سازین چال، منى داریخما باسیر!
سوکوت ایچینده هاراى سال، منى داریخما باسیر!
تلسمه گئتمه‌یه یوللار بوراندى، قاردى هله
یانیمدا بیرگئجه ده قال، منى داریخما باسیر!
خزان گلیب اوتوروب باغچادا خزللریله
اولور اویاندادا چاققال، منى داریخما باسیر!
ندندى بوردا چیچکلر آچیلمامیش سارالیر،
اغاجدا میوه قالیر کال؟ منى داریخما باسیر!
باهارگلیبدى اوره‌کلر اچیلماییر نییه بس؟
گؤتور سماوره اود سال، منى داریخما باسیر!
سن اولماسان یاشاماق بیر دومانلى دوستاقدیر
گئدنده جانیمى ده آل، منى داریخماباسیر!
اوره‌ک یامان توتولوبدور اوتور بیر از دانیشاق
دیلى شکر، دوداغى بال، منى داریخما باسیر!