من ده بئله یاشاییرام
مهرداد فخری
من ده بئله یاشاییرام
چوخ کؤلگه‌یم بیرآز ایشیق.
اوره‌کلرده دولاشیرام
گاه سکوتام، گاه دانیشیق.
بیر بولاغام سئله چاتمیش
عیوضم کی ائله چاتمیش
یاز دنی‌یم تئله چاتمیش
قلبیمده‌دیر بو یاراشیق.
دینله سن من تئللی سازام
ظولمه قارشی خان آرازام
قار چیچه‌یم، قیشدا یازام
موشتولوقلو بیر یئتیشیق.
اوجا سسلی سکوتام من
نم حسرتلی بولوتام من
یئنی‌لیکده بایاتام من
هم کوسگونم، هم باریشیق.
۸۵نجی ایل – پاییز
