بوگون دوشنبه 30 فروردین 1400 ساعات 13:44
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

مرکّب‌لیک
ح. هریزلی

مرکّب‌لشیر انسان:
ایچ دونیاسى آیریلیر
اونون چؤل دونیاسیندان.
ایچریسى سئچیلمیر
باخیشیندان گؤزوندن؛
اونو تانیماق اولمور
صؤحبتیندن سؤزوندن.

مرکّب‌لشیر انسان:
او بعضاً قورد اولالى
قویون گئییمینده‌دیر.
گاهدا قویون اولالى
قورد گئییمى گئیینیر.

مرکّب‌لشیر انسان:
بعضاً اؤز اوره‌یینده
نیفرت بسله‌دییینه
محبتله یاناشیر؛
بعضاً ده سئودییندن
نیفرتله اوزاقلاشیر.

مرکّب‌لشیر انسان:
ماسکالى یاشاماغى
اؤزونه گره‌ک سانیر،
اؤز اینانمادیغینا
بعضاً اؤزو اینانیر.

مرکّب‌لشیر انسان:
بعضاً اولور اؤزوده
باشا دوشمور اؤزونو،
دؤنگه‌لرده ایتیریر
اوره‌یینین سؤزونو.

مرکّب‌لشیر انسان:
بیر آز ایسینمک اوچون
آلولو تونقال آلتدان
او ائشیب کؤز آختاریر؛
ساده بیر دویغوسونو
دیله گتیرمک اوچون
مرکّب سؤز آختاریر.

بو مرکّب دونیادان
قاچقین گئدیر نه یازیق
ساده انسان، ساده سؤز،
ساده دویغو، صاف اوره‌ک،
ساده باخیش، دورو گؤز
مرکّب انسانلارین
مرکّب هوسیندن.
قوربان اولوم او گونه
قورتولا انسان اوغلو
اؤز الی‌له قوردوغو
مرکّب تله‌سیندن.
باهار-١٣٧٨

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *