حکیم
احمد درگاهی
نه ایتیریب، آختاریرسان
ال قویوبسان هارا حکیم؟!
بو اوفاجیق اوره‌ییمی
دئشیب، ائتمه یارا حکیم!
آچمامیشام بو سیرری من
اودور دوشوب ساچلارا دن
آوارمادین بو دردی سن
سالما اؤزون زورا حکیم!
اؤزونو ده بئله یورما
بیر سورغودا منه سورما
اویوشدوروجودا وورما
چکمه کؤنلو دارا حکیم!
منیم دردیم باشقا درددی
هاوام پَلمه، گونوم سَرتدی
بو مَحصورلوق منه تَتدی
گونوم اولوب قارا حکیم!
کدردن ارثیمی آلدیم
درمان اوچون مَحصور قالدیم
تکلیگیمده شووَن سالدیم
قالدیم آه و زارا حکیم!
