و سون نفس….
آراز آصف
منی باش آغری حب آتیر
سنی اولان دا پولیس آختاریر
اولمایاندا منی باش آغری…
دیرناغ آراسی قیرمیزی بویا وورسان هر گون
و ماتیک آرالانمیش کیمی قیپ قیرمیزی ایچینده قان
و آرالانمیش کیمی اوزاق
اوزاق اولمایاندا دا منی باش آغری حب آتیر …
و حب‌دن سونرا جئبینده ائویمین کیلیدی آچیر منی
قاچمیش بیر مارال‌دی اوره‌ییم اورکک
و اولکر
سونسوزلوق دا اولدوز قیز و قیز باش آغریسی و حب و آتیلمیش کیمی بیر حیسس
کارتون یاتاقیمدا سنی ایتیردییم گؤینه‌دیر منی
و پولیس‌لر قاتیل گزیشیرلر پارک‌لاردا
پارک‌لار بیزیم تانیشدیغیمیز یئر
و یئر بیزیم دئییل
بیزیم کی دونیانین سن او باشیندا من بو باشیندا کیمی قاداسین آلدیغیمیز الی بوشلوق
من هر پولسوزلوغومدا بیر یول سنی سئومیشیم
سونرا جئبیم دولموش بوشالمیش کیمی اولموش
و اولموش دا باش آغری من حب…
آتیلمیش کیمی‌یم ایندی‌لر،
زیبیل قوتوسونا جانیم قوربان
هاوالار شاختادیر
دالدالانماغا یئر قالماییب الی باتوملولاردان
آنام الی آغاجلی‌لاردان
من سن‌دن
سن باتوم‌دان
باتوم سازاق‌دا شتک وورموش قان‌دا
قان آرالانمیش قیپ قیرمیزی ماتیک‌دن
ماتیک کارتون یاتاق‌دا گئجه یارسی خف وورولموش بیچاق‌دان
بیچاق هامی‌دان
و
و
و
هامیمیز باش آغری‌دان
و باش آغری حب‌دن
حب مندن
قورخمور آرتیق، آتیر منی باش آغری
آغریم وار آت،
آغریم وار چاپ
آغریم وار دؤرد نالا قیرغین دوشموش اؤلوم
من اؤلوم سن یاشا،
یاشادا آت زیبیل قوتوسونا
بو سفئه گیج به‌سه‌ری.
جیرتدان یوخوسوندان باشلانیب هر شئی
اویاق قالمامیش بیر پارک‌دان و پارک ایستولوندان
و ایستولدا باش آغری یا یوخ دئمیش بیر قیز
بیرده باغیشلاییین قیز
و من بو ایکی سیندن بیری باش آغری حب آتیر
ای داد امان آمان آمان گؤزوم یوخونا وارینا کاریخیر
و حب آتیر
و باش آغری
و سون نفس….
