قیش
حیدر عبادی (باریش)

بو قیش دا باشلاندی بئله
و سن اللریم،
هه، سنینله‌نم –
ای پاییز دادیملی اللریم!
قیش پالتوسونون سیجاق جیبلرینه
یئریکله‌مه
سازاق منی یاندیرماسا
حیاتین لذذتینی
کیم داداجاق؟
کارتن ائویمین تاوانیندان
بولود آغلاییر
گونش یاندیریر
پاییز سارالدیر
قیش دوندورور
من ایسه
دوکانلار قاباغیندان
کارتن اوغروسویام
کوچه لردن چکیلیرم
اینجیمه‌سین
دیک دابان آغالار
نه یاخشی کی
قبیرلر بوشدو هله
تزه کارتن
تزه قبیر
بو گئجه
تویدو قبرستاندا
اللریمی
اویناداجاغام
اللریمی
اللریمی…