سولماز چیچک
میرحسینقلی ریاحی فر(سیّد)
سایین دوستوم «نادر الهی»یه
بو اودلار یوردونون یاشیل قوینوندا
خییوو آدلی دوغال بزه‌یی واردی.
بو گؤزه‌ل شهرین جانلارا درمان
سایسیز ایستی ـ سرین اؤزه‌یی واردی.
بئله بیر تورپاغی آز اولار گؤرمک
قارلارین آلتیندا یاشایار چیچک
ایگیدلری یوردو سئور گؤزو تک
قاتلانماز قامتی، بیله‌یی واردی.
داغلارینین دؤشو یام یاشیل چالار
کهلیکلر قاققیلدار داغا سس سالار
بولودلار اویناشار چؤلون سو آلار
قارانلیغی یاران شیمشه‌یی واردی.
یازدا قوجاقلایار چایلاقلار سئلین
قیزلار هؤرر ساچین دارایار تئلین
گله‌جک گونلرده بیزیم بو ائلین
گؤزه‌ل گونلر گؤرمک دیله‌یی واردی.
دوغولوب، یاشایان بوردا قالانین
ظالیملر جانینا لرزه سالانین
کوراوغلو دلیسی قیزین، اوغلانین
دالغالی، ساحیلسیز اوره‌یی واردی
نه یازسام یاراشار بئله اویماغا
جیرانلی، آسلانلی، داغلی تورپاغا
قاباغیندا قارا قیشین دورماغا
نادر اولان سولماز چیچه‌یی واردی.
بئله بیر گؤزه‌لی آز گؤروب جاهان
« دوست الیندن یوزلر داغا دایانان»
«ایللرجه یئدییی اولسادا یاوان»
قاپیسی آچیقدیر، چؤره‌یی واردی.
غزلی، قوشماسی … آخار بولاقدیر
باشی قارلی، اوزو گولر بیر داغدیر
اونون ایستکلیسی دوغما تورپاقدیر
ائلینه دایاقدیر، کؤمه‌یی واردی.
«یولداش چیراغینا تؤکن گؤز یاغی»
اؤزونه یار بیلن قره‌نی آغی
یولداشلار گزمیسیز آرانی داغی
هارانین نادر تک گؤیچه‌یی واردی؟
آز تاپیلار تایی نادر اولانین
عؤمرو توکنمزدیر ائل یاشادانین
«سیّد» گؤزه‌ل یوردوم آذربایجانین
نادره قوربانلیق شیشه‌یی واردی.
