اوخوماق زامانی: 2 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

یئنی بیر ریتیم
خسرو باریشان

قارانلیغی من یازمادیم گئجه‌یه،
گؤزلرین یازدی…
باخ… هک اولونور اورهییم بو تیخاجلاردا.
سول دؤشومه مایین گؤمدو سسین.
سسین اورتادوغودا گورولتودور
ساواش اوچاقلاری تانریسی.
توخوندوقجا سنه چاتان یوللارین نبضینه
شعر اولوب پاتلاییرام.
دیلیم معصوم،
آناسیز بیر اوُشاقدیر، ایتگین اولوب.
و باشلانقیجدا کلمهایدی و کلمه تانریایدی.
سوسوز قویولارین دیبینده سسلندی کلمه‌لریم!
سؤزلرین گؤزلریندن سو ایچیردیلر.
یوخ سن یوسوف دئییلسن کی…
سنی گؤسترن بارماغیمی کسدیلر،
آه… بارماغیم کیملیییمی قانیتلایاردی.
گوزگولرده‌کی اوزلرده ایتدی گؤزلریم.
اَه نه قدر اَللشسم ده
او مقدّس آدیوی
شعرلریمده سسلندیره بیلمه‌ییرم
کلمه‌لری پوزاراق توکهنن سیلگیلر شاهید.
هانی..، هانی منیم ایزلریم؟
سؤز وئرمیشدیم
بو شههرده‌کی تابولاری بیرلیکده
سیندیراجاییق سئوگیلیم
آنجاق یولوموزون تابلولاری سیندی، نه یازیق!
بورا تبریز
مین اوچ یوز دوخسان بئشین ایکینجی آیی
قار یاغیر، قار…
شههرین تکجه اوزو آغاریر، آغاریر هئی
قار دانالاری گؤیرچینلر
یوخولاریمی سنه آپاریرلار.
چورویور اورهییم بو ویجدانسیزلیق هاواسیندا
او قدر قیشسان کی
توپورسم اوزووه دونار آرزیلاریم.
سن بیر قار آدامی
اوُشاقلیغیمین الجکسیز قیزاران اَللری کردیمیزده یاراتدی سنی.
قلمیم ماتیک وورار منی چاغیران دوداقلاریوا.
قلمیم آل-قیرمیزی…
اؤلوم جیزیغیندان آیاغینی اوزاتماسین دئیه جیزیق چکر.
سوس… سوس…
دانیشسان گئنیشلهنر اؤلومون سرحدّی!
آرتیق قوجاغیمداسان، قوللاریمداسان.
بؤیودوم اوتوز اوچ یاشیندایام.
ساعات اوچ، گئجه‌نین یاریسی، عؤمرومون؟ نه بیلیم!
یاتاغیمداسان
و خییاوانلارین برکیین دؤشوندن شاعیرلیییم قارانلیق امیر…
امیر…
امیر…
امیر بازاریندان سنه سیرغا آلانمادیم.
پولوم یوخ،
آخی شاعرم. تاجیر دئییلیم کی سنی ساتانمادیم.
اولسون، قوی قار آچیلسین، قارا بولودلار چکیلسین.
سنین قولاغیوا بخت اولدوزومو سیرغا ائده‌جه‌یم.
تبیم وار.
سن تبریزیم اولا بیلمزسن.
اَرییه‌جکسن، ایته‌جکسن.
یئنیدن گؤیرمه‌یه‌جکسن!
و بو شعر سونسوزا دک
ایسلاق قالاجاق گؤزیاشلاریمدا!
یورغونام. چوخ یورغونام، آرتیق
گئجه‌نین ساچلارینی داراماقدان.
هؤروکلرینه ایلیشیب آیاقلاریم.
کیملیکسیز بیر دَلییم.
سن لئیلام دئییلسن کی…
منی توپراغیمین اورهیینه قویلایین لوطفاً.
آرتیق گؤزل و معصوم بیر قیز گزیر یازا بیلمه‌دیکلریمین سرگیسینده،
اورهییمه سو سپیر،
شعر گلنده توز اولماییر.
کتاب یوخ، بیتیک دئییر، واراقلانیر..، آیاقلانیر…
خیش… خیش… تاپ… تاپ…
یئنی بیر ریتیمدیر بو
سنی سئویرم موسیقیسیندن.

اشتراک گذاری در print
چاپ

یک پاسخ

  1. سؤز وئرمیشدیم
    بو شهرده‌کی تابولاری بیرلیکده
    سیندیراجاییق سئوگیلیم
    آنجاق یولوموزون تابلولاری سیندی، نه یازیق!

    اؤزوموز سیندیق سئوگیلیم
    اؤزوموز!

    یاپیشدی؛ دَیدی؛ یعنی توخوندو بو شئعر اوزون زامان توخونمایان یئریمه!

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *