ایکی شعر
حسین اتابک(قاییتماز)

۱٫ قاییتماز قارانقوشوم

قالدیم باهار حسرتینده
قیشیم بیتمز قارانقوشوم!
دوندوم هیجران شاختاسیندا
دؤن قاییتماز قارانقوشوم!

دورنالارلا بو باهاردا
قاییت قویما اینتیظاردا
سن گلمه‌سن بو دییاردا
باهار اولماز قارانقوشوم!

هر گلنده سنین سسین
تورپاق آلیر یاز نفسین
بو ائللرین شن نغمه‌سین
کیمسه اؤتمز قارانقوشوم!

قاییتمادین هاردا قالدین
اوره‌ییمین صبرین آلدین
سن باهاری دؤنمز اولدون
من «قاییتماز» قارانقوشوم!

۲٫ سئومه‌یه‌جه‌یم

سئون اورکلرده عشقدن اؤنجه
کئشکه حؤکم ائده‌یدی عاغیل، دوشونجه
سئومه‌ین سئویلسه گوناهدی منجه
منی سئومه‌ینی سئومه‌یه‌جه‌یم

اوره‌ک یوز چیرپینیب یوز اللشسه ده
تله‌سیب گؤروشه گؤز اللشسه ده
حیاتیم سنینله گؤزللشسه ده
منی سئومه‌ینی سئومه‌یه‌جه‌یم

کؤنلومو بیر تهر اووداجاغام
سنسیز گونلریمه قاییداجاغام
سنی گونده یوز یول اونوداجاغام
منی سئومه‌ینی سئومه‌یه‌جه‌یم

سنینله هر سؤزوم غزله دؤنسه
سنسیز شعیر باغچام خزله دؤنسه
هر نه‌ییم چئوریلیب کؤزله دؤنسه
منی سئومه‌ینی سئومه‌یه‌جه‌یم

سنی جاندا جانیم بیلسمده بئله
سنینله آغلاییب گولسمده بئله
دردیندن اوزولوب اؤلسمده بئله
منی سئومه‌ینی سئومه‌یه‌جه‌یم

«قایبتماز» سئوگیدن واردیرسا پایین
نه قدر سئویلسن او قدر اویون
من آشکار سؤیله‌دیم دونیایا دئیین
منی سئومه‌ینی سئومه‌یه‌جه‌یم