سنلی،‌ سنسیز دویغولاریم ۳
هانیه ‌تبریزلی «آیمان»

(۱)
کبریت قوطوسونا باخیردیم
«خطرسیز»دیر یازمیشدی.
آنجاق دوشوندوم کی
بیر چؤپو ایله
دونیانی اودا چکمک اولار.
سنین ده سؤزلرینی
کبریت قوطوسوندا یازیلان سؤزلر کیمی سانیردیم
یازیقلار اولسون اؤزومه گلدیگیمده
آنلادیم کی
بوتون دونیامی اودلاییب، گئتمیسن
ایندی بیر من قالمیشام،
بیر ده کوله دؤنموش اوره‌ییم!…

(۲)
سن گئده‌لی
دونیانین بوتون آجیلارینی
قوینوما بوراخیب
اوسته‌لیک، قلبیمی ده
اؤزونله آپاردین،
داها کیمسه‌یه وئرمه‌لی
اوره‌ییم یوخدور.

(۳)
اوره‌ییم سیندی
بوش وئر سینان،‌ سینمالی‌دیر.
باشینا تصدّق
قضا و قدریدی باشینان سوووشدو…
…
گوزومون یاشی آخاندا
دئییرسن:
سو آیدینلییق دی…
اولسون بو سویا
سئوگی‌ ده قاتارام
عؤمور بویو
یاشاییشین آیدین اولسون!

(۴)
آی تانریم!..
چوخ یورولدوم،
جان اوسته‌یم
ندن وار‌ـ‌ گل ائدیرسن؟
یالواریرام
قورتار منی بو ظولومدن!..

(۵)
دوداقلاریمی
سنین یئرینه،
سیگار اؤپور،
آلیشدیرماق ایستمز!
ائله سنسیزلیکدن یانمادایام
اودوم
سیگاری دا یاندیریر!..

(۶)
اوره‌یین سیخیلماییب
بیر آهین
نه قدر آجی اولدوغونو آنلاماسان!..
داریخمانین آنلامینی
داها سوروشما لطفا!
دردین،
آجی‌نین،
یانیب قوورولماغین
نه اولدوسونو آنلایا بیلمزسن!…

(۷)
تانریم!…
سئوگیمی سنه تاپشیریرام.
آمما سندن بیر دیله‌ییم وار!..
اونو بیرینین ایستی قوجاغیندا گؤرسن
اوره‌ییمی دونداریب
کدرلر ایچینه بوراخدیغینی خاطیرلات!..

(۸)
کونلونو سیندیردیسا…
سنی بوراخدیسا…
سیزلاما، آغلاما
دؤز
بو قوجا دونیادی
بیر گون…بیریئرده… بیرداش اوره‌ک
اونو دا سیندیراجاق…
بویونا آجی‌ـ‌ آجی آغیتلار
اوخوناجاق
اصلا شوبهه‌ن اولماسین!..

(۹)
اوره‌ییمی
یاتاق‌تاختیما باغلایاجام
اؤزونو ییرتیب، داغیتسا دا
قیشقیریب، باغیریب،
ائل،‌ عالمی جانا گتیرسه ده
اؤرگشمه‌لیدی؛
بو دونیادا
هر قانمازا
بئل باغلاییب، آلیشمازلار!..

(۱۰)
من
هله بؤیویوب
یئتگین‌لشمه‌میشم…
اما
بو یاشاییش…
یئتری قدر
قؤجالدیب منی…

(۱۱)
آه سئویملی کؤلگه‌م…
هئچ بیلیرسن
گونش بولود آرخاسیندا
گیزله‌ننده
نه قدر یالقیزلاشیرام؟!…

(۱۲)
اؤزون بیلیرسن
گؤزلرینین درینلیگینه
نه قدر حیرانام!
گؤزلرینده؛
بیر ماوی دنیز تاپدیم،
او دنیزده بوغولماق ایسته‌ییرم
ایزین وئریرمیسین؟

(۱۳)
آخشاملار
گون باتان چاغی
آتاسیزلیق آجیسی
یامان گؤینه‌دیر اوره‌ییمی!