دونیا بویدا اوره‌ییم
مژگان صیامی

آآآ…..ی محتشم – محترم دوستلار!
منی باسدیراندا
نیسگیللریمین شکلینی چکه بیلدیزمی…؟
بو قارانلیق داریسغالا تاپشیراندا
اللریمی گوره بیلدیزمی؟
یونولموش بارماقلاریمین
حسرت لرینه ایناندیزمی…
یالنیزلیغیمین آجیلیقیندان یازا بیلدیزمی؟
یالان اولدوغومو گؤردنوزمو؟!
منی کاغیذ ائدیب دووارا یاپیشدیرانلار
من چوخدان چورویوب
دووارلاردان آخمیشدیم…
مندن بیر شئی آختارمایین!
من شاعیرلیگیمی جئبیمده کی اسن یئللر آراسیندا،
توخ نفسیمده ایتیردیم
شعر دفتریمی
محله‌میزده کی اوشاقلارا قوش اوچورتدوم!
قافیه – ردیفی
شیطان تورولار آراسیندا قویدوم
صنعتکارلیغیمی
میکروفونلار آرخاسیندا گیزله‌دیب
هئچ اوزه گلمه‌دیم!
آنامی بیر کؤرپه سایاغی قورودوم
دیشلریمی «بیسکویت مادر»ین
مادرسیز دادیندا تؤکدوم…
فاتحه یئرینه
کیتابلاریمین توزونو
پیله‌دیم بوش وارلیغیما!
بیر جوت گؤزلریمی ده
مورگنه‌لره پای وئردیم…
آنجاق بو دونیا بویدا اوره‌ییم
اوره‌ییم!
نئجه تورپاغا یئرلشدی…
بیلمیرم!!