alirzaیول‌لار
میانالی علیرضا

اوفوقدن باشلایار باشلانیشی،
گونشدن یول آلار، یوللانار یول‌لار.
چکر بیزی آردینجا،
دورما‌دان چکر.

یولچی‌لاری چوخالدیقجا.
داها چوخ تاپدالاندیقجا،
گؤرونوشی تمیزله‌نر؛
گوموشی بزه‌نر،
نارینجی گئیینر،
آل- الوان گؤرونر؛

آچار قارالان نفس‌لری.
آچار سیخیلان،
بولود کیمی سیخلاشان
دولان اوره‌ک‌لری.
گونشدن یول آلار، یوللانار یول‌لار .
داغلاردان آشار کئچر؛
قار گؤرر؛
بوران گؤرر.
دره‌لره توش اولار،
چن گؤرر،
دومان گؤرر.
بعضا دارتینا- دارتینا یورویر،
بعضا آغرینا- آغرینا.
بعضا قیریخ بیر تئله دویونله‌نر اومیدی؛
بعضا داغا دؤنر عنادی.
بعضا چووغونا دوشر،
بعضا دومانا.
گونشدن یول آلار، یوللانار یول‌لار…

بیری- بیرینه بنزه‌مه‌سه‌ده
اوخشاماسادا جیغیرلاری، ایزلری
صاباحا دوغری چکر،
چکر اونلار بیزلری.
اومیدینی عنادینا سارییار.
عنادینی اومیدینه
گونشدن یول آلار، یوللانار یول‌لار!

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4