سئوگیلیم
رحیم کاویان

گلدى بیزه یاز قوناق،
ایندى گلر سئوگیلیم.
رقصه گلیب گول بوداغ،
ایندى گلر سئوگیلیم.

چیخما گونش، آخما چاى!
یاغما یاغیش سالما هاى!
یوللار اولون گوز قولاق
ایندى گلر سئوگیلیم.

بیر ده‌لى شیمشک شاخیر،
سرو اونا حئیران باخیر،
گؤر نه دورولدو بولاق
ایندى گلر سئوگیلیم.

دالغالانیبدیر دنیز،
یوللار اولوب تر- تمیز؛
گول گتیرین بیر قوجاق
ایندى گلر سئوگیلیم.

سئوگیلى جانان گلیر،
بیر ده‌لى جئیران گلیر؛
غنچا دوداق، گول یاناق
ایندى گلر سئوگیلیم.

گلدى بولوت، باتدى آى،
آتدى باشین یاتدى آى؛
تکجه بو گؤزلر اویاق
ایندى گلر سئوگیلیم.

چوخدا داریخما کؤنول!
گولدو باهار، سنده گول!
دولدو چاخیرلا چاناق
ایندى گلر سئوگیلیم.

رقص ائله‌یین، سازچالین!
تئز بیر اوزلیک سالین!
بدنظر اولسون اوزاق
ایندى گلر سئوگیلیم.

اوز قیزاریب لاله تک،
بیر تیکه اولموش اورک؛
تیتره‌ییرى ال- ایاق
ایندى گلر سئوگیلیم.