اوخوماق زامانی: < 1 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

alirza
گلین محو ائتمه‌یک بیر- بیریمیزی!
میانالی علیرضا

صاباحا اوغورلو یول گئتمک اوچون
دوننه بویلانیب باخاسان گره‌ک.
بو گونله دوننده فرق یوخدوسا
بس نئجه صاباحی اوغورلو گوره‌ک؟

دونندن بو گونه ده‌ییشن نه دی؟-
ائله بیل ده‌ییشن والله هئچ نه دی.
دوشمنه چوخ شئیی کئچدیک کیم ایسه
دوستونا ذره‌جه سهوی کئچمه‌دی.

بیز نییه بئله‌ییک گؤره‌سن نییه؟-
چوخ شئیین یئرینی چاش- باش سالمیشیق.
هرنه وار ترسینه دولانیر اودور-
سایدا چوخ اولساق دا آزلیق اولموشوق.

بودا اوز سهویمیز، گوناهیمیزدی،
اؤزگه‌نین بوینونا گلین آتمایاق.
چوخ شئیی قاتمیشیق، سیز الله داها
دوست‌لا دوشمنی گلین قاتمایاق.

دوشمن اوز ایشینی گؤروب بیتیریب،
بیر داها الینی نئچون بولاسین.
بیز کی اؤزوموزو دیدیریک ایندی-
کیم ایستیر بوشونا قورد تک اولاسین.

قالمیشام بیلمیرم گؤره‌سن نییه
ایشیمیز، گوجوموز دیدیشمک اولوب!
مین بیر خاصییته مالک او قورددان
بیزه تکجه آنجاق دیدیشمک قالیب.

بیز نییه بئله‌ییک گؤره‌سن نییه
چوخ شئیین یئرینی چاش- باش سالمیشیق.
هرنه وار ترسینه دولانیر اودور-
سایدا چوخ اولساق دا آزلیق اولموشوق.

نییه دوشونموروک گلین دوشونک!-
بو یوللار هارایا آپاریر بیزی.
هله چوخ یولوموز، چوخ ایشیمیز وار
گلین محو ائتمه‌یک بیر- بیریمیزی!

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *