دئمیشدین
علی تقی‌زاده لاریجان
دئمیشدین: “ایذنسیز یوخونا گلیب
بویاسیز دونیانی الوان ائده‌رم؛
مورگولو بختینین اوزونه گولوب
طالعینه قارشی عوصیان ائده‌رم؛
منله اونودارسان آجی حیاتین
قارا قاش – قاباغلی سویوق اوزونو.
یوخودا تاپارسان بو کائیناتین
سئوگی لذتینین یوزه یوزونو.”
گونلری آیلاری بیربیره دوزوب
یولونا مونتظیر عؤمور سورورم.
یوخودان رؤیادان الیمی اوزوب،
آچیق گؤزلریمله یوخو گؤرورم.
حیاتیم ائله‌جه یوخومسا بئله
هاچان بس گوله‌جک اوزومه جاهان؟
بلکه یارانیشیم یوخویموش ائله
وار-یوخ آراسیندا اوزولور بو جان!
گئجه- گوندوزومون مرسی پوزولوب،
منی بو برزخدن آماندی قورتار!،
یا منی چین اولموش بیر یوخو اولوب-
بیرباشا یوخودان یوخلوغا آپار!،
یادا وارلیغیمی ایناندیر منه
ائیله کی حیاتی یوخو سانماییم!
عشقینله اؤلومو یوباندیر منه
نه اؤزومو، نه‌ده سنی دانماییم!
کرج قیش ۱۳۹۴
