یاغما یاغیش
حیدر عبادی(باریش)

یاغما یاغیش
یاغما دئییرم!
سنسیز امما،
کیم
گؤز یاشلاریمین ایزلرینی
سیله‌جک یاناغیمدان؟
اللریم آرخامدا قاندللی؛
یاناغیما
یاناغینا
چاتماز اللریم.

یاغما یاغیش
یاغما دئییرم!
سنسیز امما
کیم
ایللرین حسرتینی
اوشاقلیغیمین بؤیوکلوک آرزوسونو
آلنیمین قیریشلاریندان
خاطیره کؤینه‌ییمین اته‌ییندن یویاجاق ؟

یاغما یاغیش
یاغما دئییرم!
من
گؤز یاشلاریمین ایزینی
ایللرین حسرتینی
اوشاقلیغیمین آرزسونو
داشییاجاغام؛
سن یاغما،
یاغما یاغیش!
گؤزل قیزلارین سیگاراسینا خال دوشمه‌سین،
بویلو قادینلارین بطنینده
کورپه لر نیکوتینسیزلاماسین
سیزلاماسین
سیزلا
ما
سین …