قوجا داغلارین
انصار قره‌داغی

آچسان بوخچاسینی آغ بولودلارین
گؤررسن پایی وار قوجا داغلارین.
حیات چالغیسیندا، دونیا دمینده
دریاسی کامیکار قوجا داغلارین.

کیم دئییر بو داغلار شعرین اودوزوب!
آللاه، تاقچاسیندا قلم‌لر دوزوب!…
داغلار مولوی‌لر، خیام‌لار پوزوب
درسیندن حظ آپار قوجا داغلارین!

سئودا سرخطی‌دیر هر گول، هر چیچک
هر بیری آللاهین قیزیندان گؤیچک
روزگارلار ، ساچینا شال، لچک – لچک
نفسی قار با قار قوجا داغلارین.

فلک «کرم»ینه «له‌له»‌یمیش قیش – قیش
جانی چالغیسیندا یانیب کول اولموش
ایتیرمیش آیدا آی، گونشده گوموش
«اصلی»‌سی بی‌قرار قوجا داغلارین.

دایانمیش گؤیلرله سینه‌به‌سینه
به، قولاق یاتیرتمیش تانری سسینه
آیاغی باغلیدیر اؤز دوعاسینا
باغچاسی نار با نار قوجا داغلارین.

اته‌یی قیبله‌گاه، ذیروه‌سی آذان
دومان تکبیرلیدیر زامان با زامان
خسته تانری باشی آلتدا بیر قرآن
بودور سیرری «انصار» قوجا داغلارین.
۹۴/۱۱/۲۹