منیم دونیام
سعید قافلان

منیم دونیام
ارزولارین دونیاسی‌دیر؛
قاناد چالیب،
یورقون گزَن یاورولارین دونیاسی‌دیر.
منیم دونیام
شیرین، او٘رکک خیال‌لارین دونیاسی‌دیر؛
اوردا منجه زاوال یوخدور!
کامال‌لارین دویاسی‌دیر!
منیم دونیام،
یوکلنیب‌دیر شیرین -شیرین، آجی-آجی!
منیم دونیام،
گؤزو یولدا یول گؤزله‌ین
حسرتلرین دونیاسی‌دیر!
اینجه، ایپک گول بوداغین اَزَنلره،
دوشمن‌لره، یاغی‌لره
نیفرت‌لرین دونیاسی‌دیر.
منیم دونیام
گئنیش دونیا،
اچیق سرگی،
گؤزه‌ل رؤیا.
منیم دونیام،
قارانلیقدان آیدین گونه سرگی آچان
اَرَنلرین دونیاسی‌دیر.
منیم دونیام
توربالاری نورلا دولو،
قارانلیقدان گلن‌لرین دونیاسی‌دیر،
اَرَنلرین دونیاسی‌دیر…