آذر نیشانلی وطن
سعید قافلان
آنا وطنیم، آذربایجان!
یئنه آذرلر گؤیره‌جکسن.
گوللو، چیچکلی آذرلر گؤیره‌جکسن؛
پاک، صاف اوره‌کلی آذرلر گؤیره‌جکسن.
آذرلر گؤیره‌جکسن یایلی، باهارلی
آذرلر گؤیره‌جکسن دورو سو آخارلی…
دؤیدولر،
آسدی‌لار،
کسدی‌لر،
اؤلدوردولر؛
آمما، اؤلمه‌دی دیری‌لیگیمیز،
مردلیگیمیز،
بیرلیگیمیز.
آنا وطنیم آذربایجان!
یئنه آییق‌دیر مرد اوغول‌لارین، قیزلارین؛
آل شفقله بورونه‌جک یاماجلارین، داغلارین؛
باغچاندا،باردان اییله‌جک بوداقلارین.
بودورکی،
گؤیده گونش
تورپاق اوزه‌رینده چیچک گوله‌جک.
یئنی‌دن بیرلیک سسی دیرچه‌له‌جک.
سؤیله‌نه‌جک بو نغمه دیل‌لرده، اینان:
سنسن بیزه گؤزه‌ل وطن آذربایجان! آذربایجان!
