سئویشیرسن‌سه، تورکجه‌سینه سئویش
معصوم جبارپور

بئینیمده کی سؤزلری نه اوخول دیلی قانیر
نه
قانماز اویونجاقلار!
بورانلی آیسیز گئجه ایدی_
گون گونو دیندیریردی!
قارا ساچلار قارانلیغا قاریشیب دالغالانیردی
گؤی مچیدین‌دن
ـ آبا! آبا! ـ سسلنیردی
دیلی قیوریلیدی بیر آجیناجاقلی کینایه ایله دئییلن موشتولوغا
هارای
تبریز یانیردی
اسید سپیلیردی اوره‌یینه
یازیق بو قوجا تبریزیم
هله ایمکله‌مه‌دن جان وئریردی
…
قیزارمیش زنجیر
اللریمین ایچینده قیرمیزی چیچکلر اکیردی
گؤزلریمی آچیرام
اوخول چانتامین قیقاج دوداقلاری آجی گولومسه‌ییر
سیللی ویریر یابانجی اللر
گئجه گوندوز
منه
منیم ایچیمه
کؤک سالیر
نه ده بؤیودوکجه چیرکینلشیر
ایللر سونرا داها «آبا» سسلنمیردی دار کوچه‌لرده
«مادر» سؤزجویو بیتیر بئینیمدن
آبا ایچیمده کی تبریزین بوروق ـ بوروق کوچه‌لریندن بورولوب گئدیر
«مادر! مادر! مادر» اوجالیر بوغازیمدان
چیخیر آغزیمدان، بیلمه‌دن
دوشان قولاق ساچلی قیزلاری
تبریز قالدیریملاریندان آتین
دووشانلار آنالاری چوخ سئویرلر
باجاریللار آنالاری ایچلرینده بؤیوتسونلر…
***
ایکی سئوگیلی
گؤز گؤزه گلیر
گولومسه‌ییر تورک قیزینین اینجه دوداقلاری
بیر دلی قانلی ائرکک ساریلیر …
اوف
سئویشیر‌سنسه تورکجه سئویش
بوینوندا اینجی باغینا تورکجه‌سینه ساریل
داغیت بیر اوووج اینجیدن بویون باغینی
“سنی سئویرم” _بیر بیتیک سؤزدو
پاسلانمیش دیلینی قیزیل سویونا وئر
سئویشیرسنسه تورکجه سئویش
بیر یاتاق اینجی…
بالیقلارین پای وئردییی اینجی‌لر شهری
قانیمی تؤکدویون آن منی آت خزره
قوی
بالیقلار سئویشمه‌یی اؤیرنسینلر
قانیما بویانسینلار آزاد قیرمیزی بالیقلار
بیریسی بیر منی اؤزومه تانیتدیرسین
من کیمم!
آبا دئدییم سؤزجوکلر تبریزین هانسی خارابالیغیندا گیزلنیب
نه اولار منی اؤزومه قایتارین
نه اولار او آبا سسله‌دییم آبانی تبریزین
دولانبادولان کوچه‌لرینه قایتارین
نه اولار قایتارین منه
یئنه ده قیزیل بایراق بالیقلار
اوره‌ییمدن دنیزه دالغالانسین
نه اولار….