بوگون پنجشنبه 2 اردیبهشت 1400 ساعات 18:08
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

riyahifar
دوشور
میرحسینقلی ریاحی فر (سیّد)

باخیشیم، پاییزین یئللری قیرمیش
یاش یئره دؤشنمیش یارپاغا دوشور.
یایدا گول ـ چیچکدن قوجاغی دولان
ایندی آغ پاپاقلی یایلاغا دوشور.

یئرین قولاغینا شئه سیرغا تاخیر
هاوانین سازاغی یاندیریر یاخیر
کؤرپه‌لرین گؤزلریندن یاش آخیر
کؤکوندن آیریلان آیاغا دوشور.

لپه‌لنیر گؤللر اوردکده، قازدا
ائلین اوره‌ک سؤزو چالینیر سازدا
کؤلگه‌لی آغاجلار جوجریر یازدا
کؤلگه‌سیزلر قیشدا اوجاغا دوشور.

یامانلیغی آتین یاخشیلیق تیلین
کؤهنه باخیشلاری گؤزلردن سیلین
اوزو آغ یاشاماق دونیادا بیلین
آزادلیق قورویان تورپاغا دوشور.

قیشا عؤمور بویو شاختادیر همدم
عدالتسیز یئرده یاسلی‌دیر عالم
قان‌سورانلار اولان اؤلکه‌ده هردم
قیش گونو تیتره‌مک چیلپاغا دوشور.

سازاغی سئونلر چئوره‌می آلیب
ایستی سئون قلبیم مین فیکره دالیب
گؤر بیزی جهالت نه حاله سالیب
دیازپامسیز هامی یاتاغا دوشور.

پاییزین سازاغی سولاجاق بیر گون
قیشین کلفینه دوشه‌جک دویون
یاشام معناسینی تاپاجاق دوزگون
«سیّد» سانما بو ایش اوزاغا دوشور.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *