بعضاً گئتمک ایسته ییرسن …
افراسیاب نوراللهی

بعضاً هر شئی بیتیر سن اوچون قورتاریر؛
یاشادیغین آداملار،
باسدیغین یئر،
داشیدیغین گؤی
بویونا بوی،
قدینه قد وئرمیر کیمی بیر شئی اولور یعنی…
و سنده بیتمیش اولورسان،
قورتارمیش اولورسان بیری لری ایچین، بیر یئر ایچین
فرق ائتمز یعنی..
بعضاً داحا فازلا،
داحا چوخ اولورسان
داحا چوخ گؤزه گلیر
و داحا چوخ چکیلمز و دؤزولمز اولورسان
او واختلار،
گئتمک ایسته ییرسن
قالماغین ایچین بیر سبب اولمور یعنی
همده هئچ بیر سبب
او واخت
آرتیق،
هارایا،
نه یه، نه چون گئتدیین ده اؤنملی دئییل
ساده جه گئتمک ایسته ییرسن…
آرتیق یوللاردا،
یولونا خالچالانمیش دئییل،
یوللار ساده جه یول یولداشین اولور
آما اؤز الین، اؤز باشیندا اولور_بوراسی اؤنملی یعنی…

بعضاً
سئونلرینده وار
سبب لرینده وار قالماغین ایچین یعنی
آما یئنه گئتمک ایسته ییرسن!
بو او دئمک دیرکی،
سنی آپاران سبب لر گوجلودور
سنی آپاران یوللار دریندی، اوزوندو
او واخت،
آرتیق یوللار ساده جه یول یولداشین دئییل،
یوللار همده سیرداشیندی، همدمین دی
یوللار
سنی مقصدینه آپاران عادیجه واسیطه لر دئییل،
یوللار اؤزو مقصدیندی
و آرتیق او یوللار ساندیغیندان دا چتیندی
ساندیغیندان دا اوزوندو، دریندی
او یوللار سنین طالعیندی
قیسمتیندی
او واخت،
آرتیق هارایا، نه یه، نه چون گئتدیین ده اؤنملی دیر
او واخت،
آرتیق قازاناجاقمیسان،
اودوزاجاقمیسان بونلار اؤنملی دئییل!
اصلینده بو اؤیله سینه بیر گئدیش کی،
بورادا
نه وارسا، هامیسی قازانجدیر
اودوزساندا قازانیرسان یعنی!
و اودوزدوغوندا بیر آزدا بو یوللار بویو نئشه لنیر، اوزانیرسان یعنی!
بو سنین الینده ده دئییل دوستوم
بو سنین طالعینده، قیسمتینده دیر…
و آز اولماییب دا بؤیله سینه گئدیش لر تاریخلر بویو، تاریخلر ائنی
مثلا امام حسینین گئدیشی
بؤیله سینه بیر گئدیش لرین ان سیمووللاشمیش و ان نمونه وی میثالی
و حیاتیندا ان آزی بیر کره بؤیله بیر گئدیشی تجربه ائتمه ین بیری
چتین کی، آنلایا بیلسینده حسینی و حسین لری
بوتون عؤمرو بویو آغلاسادا، سیتقاسادا بو حالی!
و بؤیله سینه بیر گئدیشلرده،
آرتیق “یولون آچیق اولسون” دئیه نلرده اولدو، اولمادی،
بیر اؤنمی اولمور سنین چین!
بعضاً آرخانجا آتیلان داشلاری بئله،
آتیلمایان سولاردان چوخ بیلیرسن!
بو او دئمک دیرکی،
سن گئتدیینده اینامینا، عینادینا دایانیر
و سنی داشلایانلارا اولغون اولغون گولورسن!
بو او دئمک دیرکی،
سن سن دئییل،
سن آرتیق اؤزون بیر یول اولورسان!..
یولچو یولدا گرک دوستوم…
گئت آما آغلین گئریده قالماسیندا دئمیرم
چونکو قالاجاق بیلیرم…