گوله بیلمیرم/ میربهرام رستمی(خانلار)
چئویرن: ایشیق
ترجمه: ایشیق
ایشیق
00:00
00:00

mir ebrahim
گوله بیلمیرم
میربهرام رستمی(خانلار)

نئیله‌ییم گؤرورم گؤزوم آغلاییر
گؤزومون گؤرمه‌یی سینه داغلاییر
دیزیمی تیتره‌دیر، الی باغلایر
دئییرلر گولگونن گوله بیلمیرم.

بیرینی گؤرورم یالقیز قالیبدی
بیرینین قلبینی دومان آلبیدی
بیرینی روزگار درده سالیبدی
دئییرلر گولگونن گوله بیلمیرم.

بیرینین ائوی یوخ چاره‌سیز قالیب
بیری اؤز آلتینا یون دوشک سالیب
بیرینی غم سیخیب یامان قوجالیب
دئییرلر گولگونن گوله بیلمیرم.

بیری اوشاقلیقدا یئتیم اولوبدی
غم الیندن سارالیبدی سولوبدی
فلک قول قانادین دیبدن یولوبدی
دئییرلر گولگونن گوله بیلمیرم.

بیرینین واری وار قیلینجی کسیر
بیرینین قیچی یوخ چرخ اوسته گزیر
بیرینین اوستونه سویوق یئل اسیر
دئییرلر گولگونن گوله بیلمیرم.

بیری قوجالیبدیر یوخدور دایاغی
بیری ناکام گئدیب یانمیر چیراغی
بیری چؤله دوشوب مجنون سایاغی
دئییرلر گولگونن گوله بیلمیرم.

بیرینین گؤزوندن یاشلار تؤکولور
بیرینین غصه دن قلبی سؤکولور
بیری داردا قالیب بئلی بوکولور
دئییرلر گولگونن گوله بیلمیرم.

بیری حسرت قالیب اوشاق دادینا
بیری عسل قویور قیزین آدینا
کاش هامی چاتایدی اؤز مورادینا
دئییرلر گولگونن گوله بیلمیرم.

آنالار ناله‌سی گؤیلره چیخیر
بیلَن اینسانلارین جانینی سیخیر
قاپیسین باغلاییر ائوینی ییخیر
دئییرلر گولگونن گوله بیلمیرم.

اشتراک گذاری در print
چاپ
اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email

گوله بیلمیرم/ میربهرام رستمی(خانلار)

ایشیق
www.ishiq.net

آذربایجان ادبیات و اینجه‌صنعت سایتی