ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

عؤمور آیناسی
مرادعلی قریشی- قافلانتی
(1312-1384)

وطنیمین وورغونویام، یاییلیبدیر هر یانا،

سسیم دوشوب باشدان باشا داغا، داشا، آرانا،

آند ایچیرم چیخاجاقدیر ائلیم آزاد دوورانا،

آچاجاقدیر وطنیمده چیچک دئدیم، گول دئدیم،

سینه گردیم، سؤزلریمی بم دئمه‌دیم، زیل دئدیم.

یاد ائل‌لی‌لر جان آتدیلار وارلیغیمی دانماغا،

شانلی آنا تورپاغیمدا منی اؤزگه سانماغا،

قانمادیلار، یارانمیشام ائل اوغروندا یانماغا،

باغلامیشام جسارتلی ائل‌لریمه بئل، دئدیم،

سینه گردیم، سؤزلریمی بم دئمه‌دیم، زیل دئدیم.

ائل‌لریمه ظلم ائتدیلر اوتانمادان آشکارا،

سینم اوسته چالین-  چارپاز وورسالاردا مین یارا،

آگیلمه‌دیم حیاتیمدا بیر آنلیق‌دا یادلارا،

اینانمیشام اولاجاقدیر ائلین گوجو سئل دئدیم،

سینه گردیم، سؤزلریمی بم دئمه‌دیم، زیل دئدیم.

غربت ائلده دائیم توتدوم اؤز ائلیمین سوراغین،

سؤندورمه‌دیم اوره‌ییمده وطنیمین چیراغین،

قلم چالیب، بوزوشدوردوم دارگؤزلونون دوداغین،

سارسیلمارام عملیمدن بیلمه‌ییبسن بیل، دئدیم،

سینه گردیم، سؤزلریمی بم دئمه‌دیم، زیل دئدیم.

آدلی- سانلی ائلیم واردیر، دئدیم- سانما من تکم،

نسیمی‌یم، کوراوغلویام، خان ائیوازام، بابکم،

هئچ اولماییب، اولمایاجاق مسلکیمدن ال چکم،

بیر منه باخ، یاخشی تانی، گؤزلرینی سیل- دئدیم

سینه گردیم، سؤزلریمی بم دئمه‌دیم، زیل دئدیم.

من اؤزومو یاد ائل‌لره قاتمامیشام، قاتمارام،

وارلیغیمی قارا پولا ساتمامیشام، ساتمارام،

وطنیمی گؤزلریمدن آتمامیشام، آتمارام،

بیر گون‌ده یوخ، بیر آی‌دا یوخ، نئچه- نئچه ایل دئدیم،

سینه گردیم، سؤزلریمی بم دئمه‌دیم، زیل دئدیم.

آلقیشلادیم حقیقتی آنانلارین عشقینی،

یئر اوزونده ائل دردینی قانانلارین عشقینی،

الی قابار، آلنی آچیق انسانلارین عشقینی،

نغمه قوشدوم، ایللر بویو وطن دئدیم، دیل دئدیم،

سینه گردیم، سؤزلریمی بم دئمه‌دیم، زیل دئدیم.

یازدیقلاریم حیاتیمین آیناسی‌دیر آی ائل‌لر!

عؤمور بویو حق اوستونده سالدیم هارای آی ائل‌لر!

اولمایاجاق مظلوملارین حقی داها زای، ائل‌لر!

سانجیلاجاق ظالیملرین گؤزلرینه میل، دئدیم،

سینه گردیم، سؤزلریمی بم دئمه‌دیم، زیل دئدیم.

دوشمانلارا عالم- آشکار آجی زهر دئسمده،

سؤزلریمده عؤمور بویو بوندان بتر دئسمده،

یورولماییب، گئجه- گوندوز، آخشام- سحر دئسمده،

“قافلانتی”یام ائل‌لریمه شیرین- شیرین دیل دئدیم،

سینه گردیم، سؤزلریمی بم دئمه‌دیم، زیل دئدیم.

(1): مرادعلی قریشی(قافلانتی) ۱۳۱۲-نجی گونش ایلینده چاراویماق‌ ماحالی‌نین حیدرآباد کندینده دونیا گؤز آچمیش، آذربایجاندا ملی- دموکراتیک نهضت قانا چکیلندن سونرا عائیله‌سی‌له بیرلیکده کندن چیخاریلیر و ۱۳ یاشینداایکن بوتون عائیله عضولریله بیر چوخ آذربایجانلی‌لار کیمی تهرانا کؤچور. اونون عائیله‌سی‌نین معیشت طرزی تهراندا چوخ آغیر کئچیر و بو معیشتین آغیرلیغی قافلانتی‌نی تحصیلدن محروم و چؤره‌ک چیخارتماق اوچون فعله‌لیک ائتمه‌یه مجبور ائدیر. قافلانتی عؤمرونون سونونا قده‌ر بیر زحمتکش انسان و مبارز شاعر کیمی اؤز اودلو- آلاولو قلمی‌له وطن حیثیتیندن، خالق حؤرمتیندن و زحمت آداملاری‌نین پاک سیمالاریندان محافظه ائتمه‌یی و ظولمون بوتون چیرکین‌لیگی‌ایله ووروشماغی اؤزونه بورج ساییر. اللینجی ایل‌لرده تهراندا فعالیت گؤسترن “دوستلار گؤروشو” درنه‌یی‌نین فعال عضوو کیمی چیخیش ائدیر. اانقلابدان سونرا تهراندا “آذربایجان یازیچی‌لار و شاعرلر جمعیتی”‌‌نین قوروجولاریندان اولور. اثرلری یولداش، آزادلیق، انقلاب یولوندا، یئنی یول، فروغ آزادی، امید زنجان، عصر آزادی، مهد آزادی، آذری و خدافرین کیمی دؤرو مطبوعاتدا و عینی حالدا آذربایجان حمهوریتی‌نین غزئت و ژورنالاریندا یاییلیر. بونلاردان علاوه بیر سیرا اثرلرینی احتوا ائدن کیتابلاری‌دا چاپ اولور. او جومله‌دن: (سئچیلمیش اثرلر- ۱۳۵۸)، (مجموعه- ۱۳۵۸)، (عؤمور آیناسی- ۱۳۶۹). عؤمرونون سون آیلاریندا اوستاد قافلانتی اؤز خاطیره‌لری اوزه‌رینده ایشله‌ییر و یئنی سئچیلمیش اثرلرینی یایماغا چالیشیردی کی اؤلوم آمان وئرمه‌دی.

ساهر ادبی- مدنی درنه‌یی‌نین دیرلی عضوو و آغ‌ساققالی اوستاد قافلانتی۱۳۸۴نجی ایلین آبان آییندا تهرانین شهدای یافت‌آباد خسته‌خاناسیندا دونیادان گؤز یومدو. اونودولماسین دئیه، خاطره سینی عزیز ساخلاماق اوچون اوستادین بیر شعرینی سیز عزیز اوخوجولارا تقدیم ائتدیک.

4 پاسخ

  1. اونودولماز ایللریمیزین اونودولماز خالق شاعیرلرینین بیریده تایسیز دوستوم قافلانتی دیر. او ساده شعرلرینده ، داهادا کسگین مؤوقع دن یازاردی ، او هئچ واخت یاشاماق اوچون خالقینین مصلحتینی آیاقلامادی .اومید ائدیرم اونون 80 ایل لیگینی تهراندا قئید ائدک .یولو داواملی اولسون.

  2. افتخار ايدیرم بویوک اتام استاد قافلانتی  آذربایجان خلق شاعری , آذربایجان ادبیاتینا تاثیر گویان بیر شاعریدی.و بیزیم عايلمیزه افتخار گازاندی.او ابدی یاشیر و بیزیم اوره گیمیزده دیر.

  3. چوخ ساق اولون اشیق سایتنین  زحمت کش لری
    عزیز شاعر میز قافلانتی خاطره سی دوستلارنینی  یاداشلاریندا  ابدی یاشا یاجاق آذربایجان ادبیاتنا  ایشق  سالماقینیز  بیوک ایش لر دن بیری دیر 

  4. بؤیوک اوستادیمیز قافلانتی نین خاطیره سی ابدی دیر. اونون سئچیلمیش شعرلر کیتابی اوستادین جاوان ایللرده دئدیگی شعرلره عایید اولدوغونا باخمایاراق چوخ کسگین و تاثیر قویان دیر. من افتخار ائدیرم کی انقلاب یولوندا مجله سی نین 13- نجو نمره سینده اوستادین حاققیندا اوزون بیر مقاله یازمیشام. بو مقاله 1360- نجی ایلین یای گوتلرینده بوراخیلمیشدیر. اونون خاطیره سینی عزیزله یه رک بو مطلبی و عؤمور آیناسی شعرینی کامپیوتر آرخاسیندا اوخویاراق، احتراملا آیاغا دوراق.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *