اوچوروملار کیمی!
مسعود اسلامی
قاراداغ دئپریمینین اوچوجونجو ایل دؤنومونه گؤره

کپنکلرین قانادیندا سینان، قابیرقالاریم
اوره‌ییم فوتبال میدانی چیغیریشیر اوشاقلار
یاشام یووارلاق بیر شئی!،
بو توپون هاردا دایاندیغینی کیمسه بیلمه‌ییر
یئر قودوز ایت اولاییر کیمی آغزینی آچمیش!
گؤزلرینده قات-قات قارا آغری
بئلیمده آغیر آلما یوکو!
آیاقلاریمدا داغلارین کؤکرنتیسی
قورخو،
گؤودمده اسن بایراقلار!
یوخ،
قولاقلاریمدا گؤیرن آل الوان چادیرلار
گونشین گؤوده‌سینده گؤینه‌ییرم
اوشاق اویونجاغی کیمی!
سئوگی، اؤلو بیر قوش،
قاریشقا یوواسینی‌دا دولدورانماییر!
دامارلاریمدا اوچوش هوه‌سی
اوچورام،
اوچوروملار کیمی!