اوخوماق زامانی: < 1 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

afrasiyab
دویغولارا توخونورام
افراسیاب نورالهی

دویغولارا توخونورام،
اوستوندن زامان کئچمیش،
ایچریسیندن دیوان کئچمیش،
پاییزدا کؤچوب گئتمیش،
باهاردا قاییدان دویغولارا.
ایلدن‌ـ ایله تزه‌له‌نن،
اَلدن‌ـ اَله مزه‌له‌نن،
بنؤوشه، نرگیز، فیدان دویغولارا.

دویغولارا توخونورام،
منیمله اوتوران، دوران،
واخت‌ـ بئواخت منه تله قوران،
گونده شعر قاپیلاریمدان گیرن،
قولتوغوندا قورآن دویغولارا.

دویغولارا توخونورام،
منیم‌ده قابیغیمدان چیخماق ایسته‌ین،
نئچه‌ـ نئچه شاعیرین قابیغیندان چیخان، ایلان دویغولارا.
نئچه‌لرینی‌ده شاعیر ائله‌ین یهَر، پالان دویغولارا.

دویغولارا توخونورام،
قاپی‌ـ قاپی دیله‌نن،
هر یئته‌نین اوزونه گولن،
هله دوغولمامیش اؤلن،
اوشاق، بؤیوک، جاوان دویغولارا.

دویغولارا توخونورام،
گئجه، گوندوز، غوروب، دان…
تامام مندن حیات اومان،
یازیلیب یاشایاجاقلارینا اومیدلری یقین،
گومان دویغولارا.

دویغولارا توخونورام…
دویغولارداندا اوخونورام…
بو آرادا،
هر تک‌ـ تکینه دئمه‌یه سؤزوم وارسا،
نه دئیه‌بیله‌رم من اولان دویغولارا؟!
عاغلیما، حیسّیمه تن اولان دویغولارا.
۱۳۸۲

 

 

اشتراک گذاری در print
چاپ

یک پاسخ

  1. یاشاسین دیرلی شاعیر و یازیچی ، افراسیاب نورالهی جنابلاری، اللرینیز آغریماسین، ساغ اولون.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *