غزل
اسماعیل اولکر
هر کیم سوروشسا وارمی‌دیر اکسیر؟ جوابی وار
ساقیمیزین همیشه بیزیمچین شرابی وار
بیر ساقیمیز وار اللری زر، آغزی دور تؤکر
میس سهلدیر، گتیرسین او کیم ساخسی قابی وار!!
زاهید: قاپاندی میکده! طعنه‌یله سؤیله دی…
بیلمز یازیق کی بیتیمیزین گیزلی بابی وار!
هرکس سئویب سئویلمه‌سه دونیادا بیرجه یول
جنت باغیندا گزسه جهنم عذابی وار!..
آیتلر ایچره گؤرمه‌دیم آنجاق دئییرله کی:
زیبایه باخماغین نئچه یوز مین ثوابی وار!
عشق اهلینین ندن بو قده‌ر شن‌دی حاللاری؟
عابدلرین ندن بو قده‌ر اضطرابی وار؟
مینلرجه تانری ائلچیسی واردیر کیتابی یوخ!
خوش حالینا او ائلچی کی سئودا کیتابی وار…
«اولکر» نه بخته‌وردیر الهی بو دونیادا…
تورک ائللریله تورکجه بیر جوت خطابی وار…
