کاش دؤنوب بیر الچیم بولود اولایدیم
میانالی علیرضا
شاعر ائل اوغلونون “قایا دوستلاریم” شعرینه جاواب
منی خاطیرلادین شاعر، سئویندیم
آنجاق سرت قایایا اوخشاتما، اونوت!
زامان ده‌ییرمانی اویوتدو منی
کاش دؤنوب اولایدیم بیر الچیم بولوت!
دره، دوز، یول بویو سپه‌لنئیدیم-
او قایا داغلارین آیاقلارینا.
اؤزومدن، اؤزگه‌دن گیزلتدیگیمی
دانیشا بیلئیدیم قولاقلارینا.
تاسسوف، مین کره تاسسوف، اولمور
منسیز کئچ، بیرده کئچ او یورد یئریندن!
منیم کؤنلومده‌کین دانیشماق اوچون
قایا یوخ، بیر کول سئچ او یورد یئریندن!
سؤیله قوخوسونو جانا درمه‌یه-
نانه یارپاغی تک اوره‌ییم اسیر.
یولو باشقا یولا کئچمه‌ین یولون
یولچوسو عاشیق یوخ، او یولا اسیر.
اسیرم یولومون، اینانجیمین من
اودور کی آغزیمین دادی قاچیبدی.
عاشیق اولدوغومدان نئچه قات کئچیب
هله‌ده یارامین آغزی آچیقدی.
شاعر، سن جان آتیب هوسله یازما
قایا دؤزوملویه قایا عنادی!
دوزدو، چوخ سیناندیم برکده، بو حیات-
چئویردی بوشدا دا منی سینادی.
ایندی دئیه‌جکسن عینی دئییل کی
برکده سینانماق‌لا بوشدا سینانماق.
اوردا اؤزگه‌سی‌دیر قارشیندا قارداش
بوردا اؤز- اؤزونله قارشی دایانماق!
بیر آغیر- یونگول ائت، بیر گؤتور- قوی ائت
سؤیله بو داوانین هانسی چتیندی!
اؤزونله داوادا قیوریلساندا بیل
سنی گؤرن دئیه‌ر: بو نه متین‌دیر!
ایچین گؤینه‌سه‌ده اوزون قیزارماز
آخی یاد گؤرونر دوستا، تانیشا.
گره‌ک اؤزون کیمی گؤرونمه‌یه‌سن
گؤرونسن باخ، اوندا باشلار تاماشا.
هره بیر سؤز دئیه‌ر، بیر لاف سؤیله‌یر
ائله بیل سنیندیر بوتون گوناهلار.
کیمسه بیر اوزونه دؤنوب‌ده باخماز
آخی تاپداناسی هله بیری وار.
دؤشه دؤشویه‌سن الینه دوشوب،
حیرسینی، قهرینی، آجیغینی چیخ!
داش‌قالاق ائده‌نین گوناهی منجه
داش‌قالاق اولاندان هامی بیلیر چوخ!
ائله اونا گورا بیز بو گونده‌ییک
بیز اؤز- اؤزوموزو ایچدن یئمیشیک.
گیزلن‌پاج اویناماق اولوب ایشیمیز
هله‌ده چوجوغوق بؤیومه‌میشیک.
منی خاطیرلادین شاعر، سئویندیم
آنجاق سرت قایایا اوخشاتما، اونوت!
زامان ده‌ییرمانی اویوتدو منی
کاش دؤنوب اولایدیم بیر الچیم بولوت!
