قوربت
هریزلی
یولار نئچه-نئچه، هاچا-هاچادیر
یول نئچه، هاچاسی نئچه بیلمه‌دیم.
بعضأ ده دایاندیم یول آیریمیندا
هئچ بیرین دوز بیلیب کئچه بیلمه‌دیم.
عؤمور تارلاسیندا بئجردیم آرزی
بیرینی درمه‌یه قالدیم تامارزی
عؤمرومو بیچدی‌سه زامان دریازی
آرزی حاصیلیمی بیچه بیلمه‌دیم.
حیاتدا قوربت‌دیر، اؤلوم ده قوربت
ایچیمده قوربت‌دیر، چؤلوم ده قوربت
وطنیم ده قوربت، ائلیم ده قوربت
اؤزومه بیر وطن سئچه بیلمه‌دیم.
