سئویرم
کامیل قهرمان‌اوغلو

«به‌ییم خانیم میرزایئوین روحسل سسینه»

سنی سئویرم
سئویرم سنی
اؤزونو اؤزونه بوراخدیغین کیمی سئویرم سنی
تنهالیغین کیمی
اؤزونو باشینا گئتدییین کیمی
اؤزونده ایتدییین کیمی
بعضن اؤزونه داریخدیغین کیمی سنی سئویرم
ایچیرم سنی و یئییرم کاراملین راناسی کیمی اللرینی
اللرین ال چؤره‌یی
اللرین آنام پیشیردییی جوجه قانادی
یوخسول ائومیزین سوغان سویو
کیلفه‌تیمیزین اومودودور اللرین
آتاما وورولدوغو گولـله
آنامین توتدوغو سرطان
بئله‌جه سئویرم اللرینی و سنی
حسرتینی هئچ بیر شئیله دییشمه‌رم
منه یاشامدی حسرتین
سنی بئله یاشادیغیم کیمی
سنی بئله سئودیییم کیمی‌
سنسیز اؤلدویوم کیمی وارام سنه
سنی سئویرم
سئویرم سنی هئچ کیمی اؤزونه سئومه‌دییین کیمی
سئویرم سنی- سنی سئویرم!