ائللر دورناسی
قوجا موغانلی
یئتیم شعریم نه دانیشیر نه دؤزور!
اوچور سینیر مصراعلارین بیناسی!
بایاتی تک، بالاسیندان اَل اوزور
لایلا چالمیر قوشمالارین آناسی !
خزان دوشور آلمالیغا- نارلیغا
شاختا دئییر یاشیللیغا- وارلیغا
قوجا پالید بالتالانیر دارلیغا
اسیم اسیر بو چؤللرین ناناسی!
قاغایی‌لار گئری دؤنمور خزره
گمی‌لری یوکلنیب‌دیر کدره
دالغالاری دومانلی بیر منظره
کؤچر اولور بو گؤللرین سوناسی!
سئوگی یولون کسیر قارا بیر ملیک
اصلی کؤچور، کرم یانیر هله‌لیک
دنیز یانیق! اورمان چیلیک، داغ دلیک!
لَـلـَک تؤکور بو ائللرین دورناسی!
موغان – ۹۲٫۵٫۲۰
