سنسیزلیک‌لر(۶)
مجتبی نهانی
(۱)
گؤزلریمی باغلاییرام،
سن وارسان
آچیرام،
سن وارسان
بو سنلی حیاتیمدا
هئچ “من” اولمایاجاق
گونوزلره گونشین دوغاجاق
گئجه‌لره یاغیشین یاغاجاق
دؤنمه‌دن اوره‌ییم هئی سنه دولاجاق.
(۲)
سس‌سیز یاشایاجاقدیق-
هر شئیی
سئومه‌یی‌ده
یاشاماغی دا
اؤلمه‌یی‌ده
بوراخمادیلار کی!
(۳)
بو دونیانین آغزیندا
سئومک،
ساققیز دئییل کی چئینه‌سین
سن‌سیز،
دیل‌سیز، دوداق‌سیزدیر هر شئی…
(۴)
حیاتیمین تهلوکه‌سیز بؤلگه‌سی،
سنسن.
اللرین،
باریش سئوه‌ر بیر اؤلکه‌دیر
سرحد یوخدور
ساواش یوخدور…
(۵)
باشی دومانلی
اوره‌یی قارلی
سئودا گونونده ایتمیش
اَن سونوندا تاپیلاجاق-
دوداغینین چوخوروندا.
(۶)
یاغیشدا سون داملا-
منیم اولاجاق
سیلکه‌لیرم گؤزلریمی
سنسیزلیک دوشور
یوخسوللوق قاچیر.
(۷)
ائوه یئتیشدیم
آمما نئیله‌ییم
ها باخیرام
یوخام
سنده قالمیشام
یک پاسخ
چوخ گوزل و دویغولی شیعرلر اوخودوغ
تشککورلر نهانی بی؛ سیزه بو یولدا باشاریلار آرزوم
حورمتلر و سایقیلار عزیز و دیرلی شاعیریمیز و تبریکلر