آی بابا
وحید فروتن
پروفسور ذهتابی‌نین خاطیره‌سینه

درده دؤزر چکه- چکه دردلی‌لر
“تئز تانییار درد چکنی دردلی‌لر”
درد چکنه درد اوستوندن درد وئرر
قیسمته باخ – قیسمته باخ آی بابا!

چیینیمیزده اؤزگه یوکو شله‌دی
بئله‌دی کی عؤمور بویو بئله‌دی
نر اوغول وار، یاد قاپییا کؤله‌دی
شؤهرته باخ- شؤهرته باخ آی بابا!

اؤز ایچینه اؤز ایچینده سیخیلان
اؤز ساپیندان دوغما کؤکو ییخیلان
اؤز دیلیمدی اؤز آغزیمدا بوغولان
حسرته باخ- حسرته باخ آی بابا!

حالیمیزا کیم آغلادی، اوزولدو
اوزولنلر آیاق آلتدا ازیلدی
اؤز خالقینی ازنلر وار اؤدوللو
میللته باخ- میللته باخ آی بابا…!