یاغیش
فاطمه زلفی
دامجی – دامجی یاغیشدی
اودون اوددا آلیشدی
آرزولاریم قالاندی
باشدا سؤزوم اویاندی…
دئدیم یاغیش خئیرین اولسون یاغارسان
بیر قوش اولوب زمی‌لره قونارسان
چیچک‌لرین تورپاغینا جومارسان
آغاجلارین داماریندا آخارسان
یولو، ایزی، گزیب چایا چاتارسان
قاریشارسان، قاووشارسان، داشارسان
بره‌لری آددیملاییب آشارسان
سئل – سو اولوب دووارلاری ییخارسان…
بیر دئه گوروم
آیری دوشن داغ – دره‌نی بیر بیرینه قاتارسان؟
یوخسا یولسوز آراز کیمی
داش- قوما قویلانارسان
ائل- قوهومو دانارسان
اؤزون دووار اولارسان؟…
۸۸.۹.۲۶
