نه اولور
م.ف. آزاد
بوتون آزاد یاشایان و یارادان آذربایجان یازیچی و شاعیرلرینه
هئچ یاغیش یاغماسین، چیچک آچماسین
سیلدیریم قایالی داشا نه اولور؟
دوداقلار تیکیلسین نغمه‌لر سؤنسون
دایاز دوشونجه‌لی باشا نه اولور؟
قایناسین ظولمدن اوره‌یین قانی
بیتسین حسرتلردن کده‌ر تیکانی
نغمه‌کار بولبولون سیخیلسین جانی
جهالتله دولان یاشا نه اولور؟
آتامی – آنامی یورسون مین کده‌ر
هره اؤز گونونو سو وسون بیر ته‌هر
نیسگیلی تؤره‌تسین بیزیم کند- شه‌هر
قبیرلر اوبانی آشا نه اولور؟
سوکوتلا اوز -اوزه قالیر اوزوموز
باتمیش قولاقلارا چاتمیر سؤزوموز
اولو کئچمیش‌لردن ایتیر ایزیمیز
آزغین‌لار یولوندان چاشا نه اولور؟
یوللارا سو سپسین کوسگونلوک، قه‌هر
شیرینی آجییا چئویرسین زه‌هر
آچماسین اوزونو بیزه هئچ سحر
گؤزلری یومولموش قاشا نه اولور؟
