اوخوماق زامانی: 2 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

ishiq15
آنا دیلیم
د. لطیف

خوش دیلیم  ای  سئوگیلیم  ای  لعل  دریای   هنر
بال سوزور دیلدن دوداقدان سؤیله‌سم  سندن  اگر
عزّتین   خوشدور  بو  قلبه   نشئه‌دیر   عین   صبا
خوش باهارین عطری تک  روح و  روانا  جان  وئره ر
اولموسان آرزوم و عشقیم  همده  آزادلیق سسی
هر اوره‌ک عشقه بزه‌نسه  بیل کی  آزادلیق  سئور
حؤرمت  جانسان  عزیزیم  ای  دیلیم   ای   ثروتیم
عشقیمین رویاسی سنله خوش گولوستانی گزه‌ر
دیل آچارکن سنله  سؤز  یاقوت  و  زیوردیر   بوتون
گنج  عالم   سنده‌دیر   دونیا   سنه    ائیلر   نظر
ذوق جاندیر موسیقی تک  ای آنا لای لای  سؤزون
بال  ندیر بالداندا  خوشدور  دیل  آچارکن   کؤرپه‌لر
طبعین اولموش چون شکر شربت  قلملردن  سوزر
لذت  شربت  ندیر  کی  شهد  جان دیر   بو   شکر
عصر لردن چوخ  قدیمدن  پارلاییرسان  گون  کیمی
سؤنمه‌ین بیر چشمه سن خوش مظهر علم و هنر
هر ترنم  موسیقی  خوشدور  موغاملا  چون   غزل
بو  توکنمز ذوق عشقین  روحو  دا  سرمست  ائدر
قهرمانلار   یوردوسان   ثروت    گؤزللیک عالمی
همده  وولکان تک  جوشارکن  اود ساوالاندان سوزر
بسله‌نر  سازدا  نیگارین   هاجرین  دوغما   دیلی
سنله دیل آچدی کوراوغلو  هم نبی جوشغون  خزر
دئوریم اولدون دیلده  تاریخده و  هم سؤزده  بوتون
پارلاییرسان  ظولمات  گؤیلرده  خوش  عینی   قمر
ایلدیریم  تک  یازمیسان  آزادلیقی   گؤیلرده    سن
بابکین   فریادی ‌سان   ستار خانا    مارش    ظفر
خوش آنا لایلای دیلی اولدون گؤزللیک  باغچاسی
سنله  کؤنلوم  چون دیل آچدی اولدو گؤر نه  بختور
اولموسان  معشوق  جان عؤمروم  باهاریم جننتیم
اولماسان بیر گون دیلیمده  سئوگیلیم  قلبیم  اسر
مظهر عشقیم حیاتیم خوش  گونش  تک  شرقدن
عطر شوقون  بیر شفق تک  باغ  و بستانی   بزه‌ر
نشئت جانان بو  قلبه  عین جان‌سان  جسم  ده
جان معنا سان گونش تک  روحا چون  صبح   سحر
گنج  تاریخ  چوخ  قدیم  لوح  تمدن  سیمگه ‌سی
نسل‌لردن  یادیگارسان   بحر  سؤز   جانلی   اثر
خوش  گؤزللیک عالمی  رویالارین  معناسی سان
جان  توتار سنله  نفس  روح  و  رواندا  خوش  ثمر
جنتیم   آرزوم   وطن  سن   خوش  امانت    ائللره
چوخ اساطیردن قدیم سن  قیلقامیشدان‌دا   سزر
جاودان  اولدون  بوتون  دیللرده  سن  افسانه  تک
لوح   تاریخ   و    تمدن لر    وئره‌ر   سندن     خبر
بو دیلین  قدرین  بیلیب  حفظ  ائله‌یک  بو   ثروتی
بحر حکمت  بیر  توکنمز  گنجدیر  خوش  بو   گؤهر
21.02.2014

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *