جرّاحلار
ائل اوغلو
آی سئویملی جرّاحلار!
اومیدسیز خسته‌لرین
ایستگی سالخیم‌ـ سالخیم
سئوگی دوْلو الینیزدن آسلانار.
منه یاردیم گؤسترین،
سیز منیم ایدراکیمی
احساسیملا جالایین
منه بیر کسر وئرین
اووخارلانمیش، ایتیلمیش
اووخارلانمیش ایناملا
ایتیلمیش اضطرابلا
منده بیر حکیم اولوم
محکمه‌سیز، حؤکوم‌سوز.
حؤکمومو دؤوران وئره‌ر
ویجدان‌محکمه‌سینده
اوچولماز محکمه‌مده
ده‌گیشمز فلسفه‌مده
ساغلام یاشار اینسانلار
بوتون یئر کوره‌سینده
نه اوچولار محکمه‌م
نه پوزولار نییتیم
منه بیر کسر وئرین
پارلاسین کسریمده
ایتی‌لیگیم، عنادیم
بوتون یئر کوره‌سینده
باشلاییم حکیم‌لیگه
بیچیم او کسرله من
قلبلرین قورخوسونو
گؤزلرین یوخوسونو
قلبلری قایناشدیرسین
گؤزلری قاماشدیرسین؟
کسریمین اووسونو
منیم کسریم قلم
قلبلر اولار محکمه‌م
نه دئیه‌رم جرّاحام
نه دئیه‌رم حکیمه‌م
گؤره‌ر انسانلار منی
یالنیز الیمده قلم
بیر قلم‌کی، شیمشگین
کسریندن یونولموش
دونیادا مین حکیمین
مین بیلجی کیشی‌نین
هونریندن یونولموش
منه قلم گتیرین
قولاقلیق ایسته‌میرم
ائشیدیرم اونسوزدا
قلبلرین دؤیونتوسون
قلبلرین اوره‌ک‌سسین
