ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

afandi2
قوناق
بؤیوک‌آغا افندی

بيزم عائیله قوناغي چوخ سئوه‌ر. مخصوصاً بيزيم آقاجان. اصلن قوناقدان اؤتور اؤلر. اونا گؤره ده هرگون يوز دفعه دئيير: قوناق دئديگين ائو صاحيبي‌نين دوه‌سيدي؛ هاردا خيخلاسان اوردا ياتار.
گونلرين بير گونونده بيزه بير قوناق گلدي. قوناق منيم بي بي اوغلومون، بي‌بي اوغلوسونون خالا اوغلوسو ايدي. قاپيدان گيرمه‌ميش مني قوجاقلاييب، هر اوزومه اون بئش بانكا سالدي. بير آنبار سالام يئتیرندن سونرا دستماليندان بير بالاجا گودوش، يوغورد چيخارتدي. بير ساعاتدا او يوغوردي تعريف ائيله‌دي. خولاصه نوبت يئتيشدي بيزه. من هله آغزيمي آچماميشديم بيزيم آرواد فوري سسلندي:
–          آي قارداش نه عجب؟ ناواخت گلميسيز؟ انشالله نه واخت تشريف آپاراجاقسينيز؟
قوناق بويوردو:
–          بوگون گلميشم، ساغليق اولسا نئچه گونده خيدمتيزده وارام.
بيزيم آرواد نئچه گوني ائشيتمک همان، سؤزو آغزيندا دوندو. رنگي آتدي، قيافه سي چؤندي؛ ديك دوردو. من سوروشدوم:
–          سن هارا، بورا هارا؟ گون هاردان چيخيب؟ بيزي شرمنده ائيله‌ميسن بو بير پونزا يوغوردنان.
بويوردولار:
–          سيزدن اؤتور اوره‌ييم اسيردي، گونده سيزي يوخودا گؤروردوم. فقط گلميشم سيزی گورماغا.
هله سؤزون تكينه يئتيشمه‌ميشديم کی خانیم آشپزخانادان چاغيردي:
–          بؤیوک‌آغا ناهار حاضيردي ها.
سوفره‌ني سالديق. تازا باشلاميشديق يئمه‌یه. قاپي دؤيولدو.
–          كيمدي؟
چيخديم قاپیيا گؤردوم بيزيم آقاجان..سلام آقاجان بويورون. بيردن بيره آقاجانين گؤزو باشماقلارا ساتاشدي. بويوردي:
–          او باشماقلار كيميندي؟
دئديم:
–          قوناغيم وار آقاجان.
بويوردي:
–          گئده گونده- گونده نه قوناقبازليقدي؟ بيلدير سنين قوناغين واريدي، گينه كيمدي؟
عرض ائيله‌ديم :
–          بي بي اوغلونون، بي بي اوغلوسونون خالا اوغلوسودو.
يبلاخره آقاجان گلدي ايچري‌يه. هامي دوردو اياغا. آقاجان بويوردي:
–          ايله شين.
دوز گئتدي قوناغين باشي اوستونه:
–          اوغول نييه گلميسن؟ نه ايشين وار؟ بيلرم ائله سيزين بورادا ايشينيز اولاندا بيز يادا دوشه‌ريق.
یئرلی- ديبلي توضيحات آلير، بير ياريم ساعات بازجولوقدان سونرا  گئتدي اوتوردو موبلون اوستونده. اوزون ده چئويريب پنجره يه طرف.
–          آقاجان بويورون ناهارا.
–          من يئميرم، وئر ائله قوناغين يئسين.
–          آقاجان دوگودو ها گل بير تيكه يئه.
–          يایين گونونده نه دوگو بازليغيدي؟ بير آز ائيران چالايديزدا. دئيه‌سن بو بورني فيرتيقليلار دوگو يئمه‌سه‌لر عمللري آشماز.
بيردن بيره آقاجان نوشابه‌لري گؤردو. دئدي:
–          او شوشه‌ده كيلر نمنه دي؟
دئديم:
–           نوشابه دي آقاجان .گل بير ايستيكان دا سن ايچ.
–          من ايچميرم،  وئر ائله قوناغين ايچسين.
باشلادي دئينمه‌گه. كاسيبين اوشاغينین عقلي اولماز، دئيه‌سن نوشابه ايچمه سلر چؤره‌ك بوغازلاريندان گئتمز. اوزونو توتوب قوناغا طرف:
–          آقا سن هر گون ائوينده نوشابه ايچردين؟
قوناقي بتر تر باسيب. آقاجان دا اؤز ايشينده‌دي.
–     خالقين اوشاغي دده، ننه سينين فيكرينده اولار. بيزيمكيده يا دوست اوينادار يا قوناق. دييه سن دده‌سينين تويودور ،گونده -گونده قوناقليق وئرير نوشابه وئرير.
خولاصه بيزيم آقاجان دوردو اياغا. ميرتدانا- ميرتدانا گئدير، هردم ده بير چپ- چپ قوناقا باخير. هله آقاجاني يولا سالماميشديم، خانیم چاغيردي:
–          بؤیوک‌آغا! بير ديقه گل بورا.
گئتديم آشپزخانايا.
–          تئز اول پول وئر گؤروم ، شاما هيچ زاديميز يوخدوها!
چوخ ساياندان سونرا مندن بير اون مين آلدي. برنامه باشلاندي. شاما اوملت، ناهارا كوكي. ايندي بير هفته دي بو برنامه‌نين ايدامه‌سي وار. نه قوناغين گئتمک قصدي وار، نه آروادين بير قيران تخفيف وئرمک. ياواش- ياواش قوناق بئش اون كيلو وزن آزالتدي. بير اوندا گؤردوم آرواد بارماغينا تازا بير اوزوك ساليب. اوشاقلاردا كشف ائيله ديلركي هله قوناق تازا باشلاييب ايش آختارماغا. آقاجان دا گونده اوچ دفعه سوفره‌ني يئره سالماق همن تاپیلیر. ائله بيل توكون توتموسان اودا. بير ياريم ساعات بازجولوق ائيله‌يير، تذكور وئرير، دوزه‌لير يولا. خولاصه اون گونده بئله گئچدي. من گؤردوم منيم بو بي بي اوغلومون، بي بي اوغلوسونون خالا اوغلوسونون هله گئتمک قصدي يوخدو. درديمي همسايالارين بيري‌ایله آرايا قويدوم. او مني دوشوندوردو كي گره‌ك نئیله‌یک.
گئجه اولدو شامي يئديک. قوناق گئتدي ياتدي. هله تازا يوخلاماميشدي بيزيم همسايا بير ايكي هوايي تير آتدي. بير ايكيسين‌ده قوناق ياتان اوتاغين در، دووارينا ویردی. بير اوندا گؤردوم قوناق تر- تلسيك يوخودان دوردو:
–          نه اولوب، جنگ باشلانيب؟ بمباردماندي؟
دئديم:
–          يوخ. سن سس- سوي چيخارتما. تئز گيزلن.
گؤردوم قوناغين رنگي آتيب، بتر ناراحاتدي. دئدي:
–          سن الله دئه گؤروم نه اولوب؟
دئديم:
–     واله ايكي آي بوندان قاباق بير گئجه من توفنگيمي تميز‌له‌ييرديم. اليمدن بير تير قورتولوب گئتدي ديدي بو همسايانين قوناغين یارالادی . همسايادا آند ايچيب بيزه هر نه قوناق گلسه اونو اؤلدورسون . ايندي بيليب بيزيم قوناغيميز وار، ايسته‌يير  سني اؤلدورسون. آمما سن قورخما. قوي او سني اؤلدورسون. اگر او سني اؤلدورسه، من اونون بوتون خانواده‌سين اؤلدوره جاغام.
بير اوندا گؤردوم قوناق باشماقلارين ووروب قولتوغونا تو دابانا نئجه قاچير. نئجه گئدير جت كيمي. فقط دئيير:
–          من گئتديم سن بيلرسن همساياونان.
بو ماجرادان ايندي ايكي گون گئچير. بيزیم آرواد چوخ ناراحاتدي. آغزيندان چيخاني همسايايا دئيير. آخي ائله بيل تصميم توتموشدو بير گردنبند ده آلسين. آقاجان دا مطمئن اولوب كي داها قوناق گئديب، اصلاً بيزيم طرفه دولانمير….

 

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *