بوگون پنجشنبه 2 اردیبهشت 1400 ساعات 18:15
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

afandi
آلا قارقالارین نخلی یئره گلسین
بؤیوک‌آغا افندی

ائهی… اوشاقلیق هاردا قالدین؟ ایتدین باتدین، خاطیره‌لر دفترینده یاتدین. هله ایشدن چیخمامیشدیق؛ دزگاهلاردان اوشاقلارین یورقون سسی گلیردی: بیری‌دی، بیردی، بیردی … سودان گلن سورمه‌لی قیز، کوزه‌نی وئر من گوتوروم … تاپ، تاپ، تاپ … دفه‌نین سسی باشقا سس‌لری کسیردی. هردم ده بیر آغاجان‌دان گیزلین جیبیمده‌کی آشیقلاریمی یوخلویوردوم. دزگاهین اوستونده اویان بویانا کئچنده دده‌مین چرخی منه قاش گؤز آتیردی. تلسیردیم ایشدن تئز چیخام؛ چرخی گؤتورب گئده‌م چرخ سورمه‌یه، آشیق اویناماغا.

اکبر قارا‌یلا چوپور قولام کرخانایا گلدیلر. گؤزوم اولاردا اولماسایدیدا قولاغیم اولاردایدی. بیرآز اویان بویاندان دانیشاندان سونرا چوپور بیزیم آغاجانا دئدی: ائشیدیبسن دونن گئجه حامامچی ماحمودون ائوین کسیب‌لر؟ آغاجان نه آلدی نه ساتدی دئدی: اونون ائوین کسماغا نه‌وار، اوغرونون گؤ… وار گلسین بیزیم ائوی کسسین. قوش، قوشلوغوندا، قارقا قارقالیغیندا بیزیم دامدان گئچه ‌بیلمز. آغاجانین بو سؤزوندن بتر کئف ائله‌دیم کی گل گؤره‌سن. اؤز- اؤزونه قولتوغومون آلتی بیر آز شیشدی.

قاش قارالمیشدی اؤزومو ائوه یئتیردیم. چرخی حیه‌طین بیر بوجاغیندا دیوارا دایادیم. تر- تلسیک ائوه قاچدیم؛ هله آغاجان گلمه‌میشدی. ننه‌م میت-‌میت میتدانیردی: چرخی نییه آپارمیشدین؟ او شالوارین دیزلرین هاردا او جور جیریبسان؟ سن اؤله‌سن ایندی دده‌ن گلسه اؤلدوره‌جک. به سن صاباح مدرسه‌یه گئتمیه‌جاقسان؟

قورخونون بالاسی اؤلسون؛ تئز دوروب کیتابلاریمی تاپدیم یالاندان کیتابلارا باخیردیم؛ گؤزوم قاپیدایدی. اوشاق اولمویاسان, ائله کیتابلاری اله آلماغیمی بیلدیم، هئچ بیلمه‌دیم نه‌واخت یوخلامیشدیم. قورخودان یورقانی چکدیم باشیما. دئییردیم به دده‌م گلیب ائوه منی دؤیماغ ایستیر. بیر اوندا آغاجان یورقانی اوستومدن چکدی. ننه‌م آغلایا آغلایا:

–          دئمیرم ائله سنین گوجون بیر قاریش اوشاغا چاتا؛ ائله ائله‌مه قورخار.

آغاجان دئییردی: اؤلمویوب کی، بیر بئله های-‌کویونن نه یاتماسی؟ قوی دورسون گئتسین عمیسی‌گیلدن منه بیر شالوار آلسین گتیرسین.

ننه‌م پنجره‌نین ایچینده اوتورموشدو؛ چادراسی بوینوندا دئییل‌دی. آغاجان‌دا منیم باشیم اوسته رئژه گئدیردی. اوشاقلار مدرسه‌نین حیه‌طین گئیمیشدیلر باشلارینا. هله اؤزومه گلمه‌میشدیم آغای نوبخت قولاغیمدان یاپیشیب, سورویه- سورویه منی آپاریردی دفتره:

–           آغای علیزاده! من بون‌نان باشارابیلمیرم، آخشام چاغی کوچه‌ده توپ اویناماغی، چخ سورماغی، آشیق اویناماغی، دام- ‌دوواری گمیرماغی بس دئییل ایندی‌ده شورتونان گلیب مدرسه‌یه. یه گئتسین دده‌سین گتیرسین، یه‌ده پرونده‌سین وئر قولتوغونا.

آغلایا آغلایا ائوه قاییدیردیم. آغای نوبخت بیلمیردی کی آلا قارقالار دونن گئجه دسته‌سیله بیزیم دامین اوستوندن کئچمیشدیلر…

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *