بوگون چهارشنبه 1 اردیبهشت 1400 ساعات 18:57
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

20120903071634cb-عمران صلاحی
بيردن- بيره
عمران صلاحي

1-     اون و بال

بير نفر اون و بال آلميشدي، مئشه‎يه گئديردي.

سوروشدولارکي: «اوردا نه ايشين وار؟»

مئشه‎ده آيي توتماغا گئديرم.

سوروشدولار: «نييه بال آپاريرسان؟»

دئدي: «آيي‎نـين، بالدان خوشو گلير. بير آز بال قوياجاغام آغاجين اوٍستوٍنه، بير آز دا ياخاجاغام آغاجين تنه‎سينه.»

سوروشدولار: «ياخشي، نه اولسون؟ منظورون ندير؟»

دئدي: «آيي بال يئمک اوٍچوٍن، آغاجا ديرماشاجاق. ائله کي، بالي ‎يئدي، کئفلي- کئفلي آغاجدان ائنه‎جک، اوندا بال بدنينه ياخيلاجاق.»

سوروشدولار: «پس او اونو نه اوٍچوٍن آپاريرسان؟»

دئدي: «اونو دا تؤکه‎جييم آغاجين ديبينه. آيي، ائله کي، آغاجدان ائندي، دوٍشه‎جک اونون اوٍستوٍنه، باشدان آياغا اون اولاجاق. سونرا دوروب گئده‎جک ائوه. من ده داليسيجا. يئکه- زيرپي آيي ائوه گيرندن سونرا، گئده‎جک آينانين قاباغيندا داياناجاق، اؤزوٍنه باخاجاق، گؤره‎جک باشدان آياغا آغ-آپباق اولوب. ائله بيله‎جک کي قوٍطب آيي‎سيدير. دئيه‎جک: «من کي قوٍطب آيي‎سييام، بوردا نه قاييريرام». يوٍكوٍن چاتاجاق گئده‎جک قوٍطبا. من ده داليسيجا. ائله کي، يئتيشدي قوٍطبا، بدني دوناجاق، داها حرکت ائله‎يه بيلمه‎يه‎جک، اوندا من ده يئتيشيب اونو شيکار ائده‎جگم.»

ايندي من بيلميرم بو کيمين حئکايه‎سيدير. اگر سيز بيليرسيز بيزي ده جرياندا قويون.

2-     عمّهنين ائوي

بير موٍددتدير تهرانين اطرافيندا، شهرجيک‎لرين بيرينده ياشايـيريق. بير قوراضا ماشينيميز وار، اونونلا اؤزوٍموٍزوٍ تهرانا يئتيريريک. بير گوٍن بير مؤحترم آغا شهرجگين باشيندا دايانميش ايدي، منيم قاباغيمي کسدي. خاهيش ائله‎دي کي، اونو اوتوبوس داياناجاغيناجان يئتيرم. اونو يئتيرديم داياناجاغا، دايانديم کي، يئنه

دئدي: «ائله‎يه بيلرم بير آز آشاغي‎ليق دا ائنم؟»

دئديم: «خاهيش ائليرم.»

يولون آراسيندا سوروشدو: «سيز چارراهين باشيناجان دا گئديرسيز؟»

دئديم: «هن.»

دئديم: «پس من ده اوراياجان سيزين‎له گليرم.»

دئديم: «خاهيش ائليرم.»

چارراها کي، يئتيشديک، سوروشدو: «تهرانسرين» «سه راهينا» دا گئديرسينيز؟»

دئديم: «چوٍن مئيدان-ي آزادي‎يه گئديرم، ايستر- ايسته‎مز او اورادان کئچه‎جم.»

دئدي: «نه ياخشي، پس من ده سيزله مئيدان-ي آزادي‎يه گليرم.»

سونرا سامسونئت کيفيني آچدي، بير کيتاب چيخارتدي و چوخ راحات باشلادي‎ اوخوماغا. آزادي مئيدانـينا کي، يئتيشديم، دايانديم کي، طرف دوٍشسوٍن. پوليس گلدي بئش مين توٍمن مني جريمه ائله‎دي. مئيداندا دايانماق ياساق ايدي. يولا دوٍشدوٍم.

مؤحترم آقا سوروشدو: «بوردان هارا گئده‎جک‎سيز؟»

دئديم: «عمّه‎مين ائوينه.»

دئدي: «سوروشا بيلرم عمّه‎زين ائوي هاياندادير؟»

3-     سياست

بيري دئدي: «سياسته گيرمه».

دئديم: «بيز سياسته گيرميريک، سياست بيزه گيرير!»

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *