بیر باهار گونو, بیر چیچکلی آغاجین آلتـیندا, لاله پارکـیندا, بیر کیشی کی کوتونون سول قولتوغونون جیبینه قویموشدور, نیمکتین اوستونده, بیر کیشی ایله کی نظره گلیردی تازا بازنشسته اولوب دانـیشـیردی:
– دوز بویورورسوز, اقتصادی سیخینتیلار همیشه باعث اولوب آدام بعضی شئیلری زیندگانلیقدا حذف ائلهسین. آدام ائلهیه بیلمز ات, چؤرهک و یاغ آلمایا, آمما ائلهیه بیلر مثلن کیتابی اؤز برنامهسیندن حذف ائلهیه. آدام خورک یـئمهسه اؤلر, آمما اگر کیتاب اوخوماسا, اونا هئچ بیر شئی اولماز، تازا مومکوندور ترقّیده ائلهیه, خلاصه لازیم اولمایان شئیلرین حذفی آداما ضرر وورماز.
منیم بئش قـیزیم وار. دورد اوغلان هاواسینا دونـیایا گلیبلر. بئش‌ایل بوندان قاباق, اوّلکی قـیزیمی گرهگ اره وئرهیدیم. آمما جئهیز آلماغا پولوم یوخ ایدی. نه پس‌اندازی واریدی, نه ساتماق اوچون بیر درده دیهن شئی. وام آلماغا دا ایمکانـیم یوخ ایدی. بیر گون بو پارکدا اوتورموشدوم روزنامه اوخویوردوم. گؤردوم بیر مناقصه آگهیسینده یازیبلار: «بؤیرهک آلـیریق».
اؤزومله فیکیرلشدیم کی، دونـیادا چوخلاری بیر بؤیرهکله زیندگانلـیق ائدیرلر. نییه بو آللاه وئرگیسی سرمایهدن استفاده ائلهمهییم.
بؤیرهکلریمین بیرینی ساتدیم, اولکی قـیزیمی ار ائوینه گؤندهردیم. بیر ایلدن سونرا ایکینجی قـیزیم ارلیک اولموشدور. یـئنه هامان پولسوزلوق‌ایدی و هامان چتینلیکلر. منیم آبیریم واریدی, ائلهیه بیلمز ایدیم ایکینجی قـیزیمی جئهیزسیز ار ائوینه گوندهرم. یـئنه بیر گون بو نیمکتین اوستونده اوتوردوم و بدنین آیری یـئرلرینه فیکیرلشدیم. البته او یـئرلرهکی جوت ایدی. مثلن گؤزلریمه. اؤزومله دئدیم ایکی گؤزو نئیلهییرم. مگر گؤرمهلی شئی ده وار؟ نییه بو قات- قاریشـیق دونـیانـی ایکی برابر گؤروم و ایکی برابر عذاب چکیم. هر نه روزنامهلرین آگهیسینه باخدیم, گؤردوم گؤز آلان یوخدور. اؤزوم بیر آگهی وئردیم، روزنامهلرین بیرینده چاپ ائلهدیلر. بیر گوندن سونرا موشتری تاپیلدی، ایکینجی قـیزیم دا اره گئتدی. ایندی گؤزلریمین بیری شوشهدندیر.
بیر ایلدن سونرا اوچونجو قـیزیمین نووبتی ایدی. هامی قاپیلار اوزومه باغلی ایدی. بیلمیردیم نئیلهیم. آز قالـیردی باغریم چارتلایا. قولاقلاریما فیکیرلشدیم. دئدیم اونلارین بیرین ساتارام, آمما کیم قولاق آلاجاق ایدی؟ چوخ مایوس پارکدا اوتورموشدوم, روزنامهنی ورقلهییردیم، گؤردوم آگهی صحیفهسینده یازیبلار: «بدنین هر یـئرین آلـیریق» ائلهبیل دونـیانـی منه وئرمیشدیلر. تئلفون ووردوم سوروشدوم قولاق دا آلـیرسیز؟
دئدیلر: بیر نفر اونلارین موسسهسینه موراجیعه ائلهییب، دئییر کی، قولاقلارینـین بیرین بیر داوادا الدن وئریب, ایندی ائلهیه بیلمیر قولاقسیز کیتاب اوخویا. سوروشدوم قولاغـین نه ربطی وار کیتاب اوخوماغا؟ دئدیلر: موشتری قولاغـی بوندان اؤتورو ایستهییر کی عئینکینین دستهسین قویا اونون اوستونه. تئز معامله باشا چاتدی. اوچونجو قـیزیم دا ار ائوینه گئتدی. ایندی توکلریمی اوزاتمیشام، توکموشم باشـیمین اویان- بویانـینا, بیلینمیر بیر قولاغـیم یوخدور.
بیر ایلدن سونرا دؤردونجو قـیزیمین نووبتی ایدی. اومیدیمی لاپ الدن وئرمیشیدیم. آمما دوز هامان وقت هامان موسسهدن منله تماس توتدولار کی، فوری بیر سول اله احتیاجلاری وار. سئوینجک اولدوم. داهی سوروشمادیم نه اوچون ایستهییرلر. تئز گئتدیم بیمارستانا, سول الیمی وئردیم، اونون پولو ایله دوردونجو قـیزی دا اره وئردیم. یاخچی ال ایدی. بیر بارماغـی سینمیشدی، آمما یاخچی ایشلهییردی. او تاریخدن بویانا اوزویومو ساغ الیمین بارماغـینا تاخمیشام و ایندی موشتری منیم الیمله نه ایشلر گورور- آللاه بیلیر.
بیر ایلدن سونرا گرک آخیر قـیزیمی اره وئرهیدیم. یـئنه هامان پولسوزلوق ایدی و هامان گرفتارچیلـیق. گلدیم بوردا بو گؤلون قـیراغـیندا اوتوردوم و بدنیمین آیری یـئرلرینه فیکیرلشدیم. آیاغـی ساتماق اولماز ایدی. ماشـین آیناسیز و قاپیسیز یولا گئده بیلر، آمما تکرسیز یوخ. بورنومو دا اولمازدی ساتام, اوندا قیافهمی الدن وئرهردیم. دیلیمی ده آلمیردیلار, دئییردیلر چوخ ایتیدیر. بیر دیله احتیاجلاری وار ایدی کی، یالاندان تعریف ائلهسین. بیلمیرسیز نه موکافات ایله آخیر قیزیمی اره وئردیم. او گئتدی ائو- ائشیگینین باشـینا.
آمما ایندی من اؤزوم ائودن آوارا اولموشام. آروادیم منی ائوه یول وئرمیر و دئییر من داهی نه اومیدله سن ایله یاشایـیم.
