ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

afandi
بیزیم بالدیزین تهران سفری
بؤیوک‌آغا افندی

بيزيم بالديز كوبرا بير آي بوندان قاباق توي ائله‌ييب گئتدي تهرانا. بو گون خبر وئرديلر کي گؤروش اوچون بيزه گله‌جک‌دیر. انتظار چوخ چكمه‌دي، قاپي دؤيولدو. آرواد دئدي: كوبرا گلدي، قاچين قاپيني آچين!

 قاچديم قاپيني آچديم، گؤردوم كوره‌كن تك‌دي!

–   آبالا! هاني بس كوبرا؟

عسگرآقا دئدي:

–  كوبي‌ده كوچه‌ده، همساده‌لرنن دانيشير، الان گلر.

 هله عسگرآقاني يئر به يئر ائله‌مه‌ميشديم، گؤردوم كوبرا قيشقيرير. تئز قاچديم قاپييا، گؤردوم كوبرا آستانادا دوروب؛ بيزيمده بير گؤزه‌ل خوروزوموز وار، اودا دوروب حيطين او باشيندا باخير قاپييا.

 دئديم: هه نه اولوب؟ نييه قيشقيريرسان؟ بوردا نييه دورموسان؟

–  سلام عمواوغلي، او خوروز مني قاپوري.

دئديم: كوبراجان قاپموري، باخوري. اونون كي سندن اييرمي متر فاصله‌سي وار.

من بير دريندن باخديم کوبرانين قيافه‌سينه، گؤردوم بير دودي عينك ووروب، چادراني‌دا قويوب يئره، ديزينه‌جه‌ده چيرمالانيب؛ اؤزون بير وضعه ساليب كي، خوروزدا تعجب ائيله‌يير.

اؤز- اؤزومه دئديم: ائله خوروزون حاققي وار سني قاپسين.

–  بويورون، بويورون!

هله گلديلر ايچرييه؛ خوش- بش اون- بئش‌دن سونرا، بويوردولار:

–  عمو اوغلي، تهرانين خوروزلاري چوخ با ادب‌ديلر. اصلاً آدامي قاپمازلار، سيزين خوروزوز وحشي‌دي،‌ من اوندان بتر قورخورام، گتيرين اوني كساخ.

دئديم:- كوبرا سن اؤزون بيزيم خوروزو تانييرسان، چوخ ادبلي‌دير! ناهاراجان بانلاماز كي بيردن، باجين يوخودان دورار، ناراحات اولار. تازا محله اهلي‌ده دئيير بؤيوك‌آغانين خوروزوندان معرفتلي خوروز بو محله‌ده يوخدو. گوناهدي، آللاها خوش گلمز بوجور باشي آشاغا خوروزو كسه سن.

 قوناقلار راحاتلاشديلار بيلدير كي من خوروز كسن دئييلم. آرواد ايشي بئله گؤرمک همن، فوري سؤزو عوض ائيله‌دي:

–  عسگرآقا خوش گليبسيز، نئچه گون بورداسيز؟

عسگر دئدي: واللاه، مرخصيم يوخدو، گره‌ك دوشنبه گونونه‌جن گئداخ.

ائيله كي آروادين اوره‌يي گلدي يئرينه، بير ايكي دفعه دئدي:

–  آ… بو تئزليقدا نه خبردي؟ هئچ اولماسا بير ايكي گون قالين.

 من سوروشدوم:

–  عسگر آقا نه ايش گؤرورسوز؟ هاردا ايشله‌ييرسيز كي، بوجوره تلسيرسيز؟

 كوبرا فوري جاواب وئردي:

–  اصغرآقا بالاي شهرده، ميدان شوش‌دا، كوپون خريد و فروش ائيله‌ييرلر. قورخوللار تئز گئتمه‌سه‌لر يئرين توتارلار، اورداندا اخراج ايلرلر. اونا گؤره‌ده گره‌ك تئز گئداخ.

هله كوبرانين سؤزو قورتارماميشدي كي بيزيم اوشاقلارين بيري سوروشدو:

–  بابا، بس نييه كوبرا خالا تهرانا گئدندن كارتونلار كيمي دانيشير؟

من هله جاواب وئرمه‌ميشديم، آرواد بتردن بير گؤزلرين آغارتدي. اوشاق فوري ال- اياغين ييغيشديردي. بير اوندا گؤردوم قونشوموز سوره خالا ييرقالانا- ييرقالانا، دانيشا- دانيشا حيطين او باشيندان گلير.

–  آي بالا گؤزلرين آيدين اولسون. كوچه ده آروادلاردان ائشيتديم كوبرا خانيم گليب، دئديم بير گئديم گؤروم. من كوبرانين خاطيرين چوخ ايسته‌رم. تون ‌به تونين قيزلاري بئكارديلار؛ ييغيشيرلار كوچويه، هره بير سؤز دئييرلر. بيري دئيير: كوبرا تهرانا گئدنن قيرجانا- قيرجانا دانيشير، بيري دئيير: كوبرا تهرانا گئدنن قودوخلانا- قودوخلانا يئريير! دئديم: سيزي آللاه بوسؤزلري ييغيشديرين، من چوخ سئوينيرم كي گئديب تهرانا، قويون گئتسين، بئيه آدام اولدو.

هله سوره خالانين اؤپوش- گؤروشو قورتارماميشدي كي گؤردوم اييليب بيزيم آروادين قولاغينا دئيير: آي قيز، اوشاغي وار؟

بيزيم آرواد باشين بير يوخارييا آتدي.

–  آللاه جان ساغليغي وئرسين، خداحافظ.

سوره خالا بونو دئييب،کوچه‌يه سوزدو.

او گون كوچه‌ده هامي كوبرادان دانيشيردي. ناهاردان سونرا دربند باشيندا آروادلارين آراسيندا بتر اختلاف دوشموشدو. بير عده مطمئن‌ايديلر كوبرانين اوشاغي وار، بيزيم آرواد يالان دئييب، نظرلمه‌سينلر. بير عده ايكي اياقلارين گئيميشديلر بير باشماغا كي، دوكتور كوبرايا جاواب ائله‌ييب. بير عده‌ دئييرلر، كوبرانين اري كوپون آل- وئر ائله‌يير. بر عده‌ده دئييرديلر اؤزلري ائشيديبلر كي اونون اري شوشه ميدانيندا ايشله‌يير. بير نفرده آند ايچيردي‌كي، كوبرانين اري دللك‌دي. بيزيم آرواددا فقط بالاي شهردن دانيشيردي. كوبرانين ننه‌سي‌ده بتر ناراحت‌ايدي، قورخوردو بئله گئتسه كوبرانين ديلي ياديندان چيخا. اونا گؤره‌ده كوبراني يولا سالاندا تئز- تئز دئييردي:

–   بالا موغايات اول، اؤزوندن چيخما، اوزووي ايتيرمه! ديلسيز آدام ننه‌سيز آداما تايدي.

 ماشين يوللاندي، عسگرآقا ایله كوبرا باي- باي ائيله‌يير‌ديلر. من ده صاباحکی گونلره فيكيرلشيرديم.

3 پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *