غريبه گيره دوشدوم!؟
حمید آرش آزاد
آلتميش ياشي قويدوم دالا، آلتميش بيره دوشدوم
آلتميش بير ايل اولموش، بو جهان‌دا گيره دوشدوم
شك‌سيز، منه روزي يازيليب تك لبنيّات
شيت سوددن آنام آچدي‌‌دا، شور پنديره دوشدوم
شايد‌ده فلك اؤنجه‌سي گون روزي يازيرميش
يول‌لار ترافيك اولدو، قاليب، تأخيره دوشدوم
وارلي اوشاغي موز يئدي، نارگيل‌ده دويونجا
من‌ده بير اووج قوردلو- چوروك انجيره دوشدوم
قيش فصلي دوغولدوم، ولي عؤمروم بويو يانديم
بلكه سببي شاختا ايدي تنديره دوشدوم؟!
يئرسيز دگيل ايپ باغلاييرام چوخ‌لارينا من
اوّل‌ده اؤزوم بنده گيريب، كنديره دوشدوم
تاختا بئشيگ آلميشدي آتام، چئوره‌سي زنجير
اون گونلوك ايديم من، او زمان زنجيره دوشدوم
آزادليق اوچون، اسكي- بلك‌له گوله‌شيرديم
شؤرتوك بادالاق سالدي، ييخيلديم، زيره دوشدوم
شؤرتوك- بلك‌ايله ال- آياق باغلانير اوّل
لاپ دوز دوغولان گون بو آجي تقديره دوشدوم
گويا او زمان چوخلو خرابكارليق ائديرديم
يوزلر يول آتام حُكم وئريب، تعزيره دوشدوم
ظنّيم بودو، غرب ائيله‌دي فرهنگي تهاجم
چون‌كي، بو خرابكارليغا بيردن- بيره دوشدوم
آمريكالي يوزلر كانال، اينتئرنئته لعنت
چون‌كي، هله قونداق زماني تقصيره دوشدوم
نئيله‌ك؟ يئتيب آلتميش بيره ايندي ياشيم، «آرش»!
مس اولدو قيزيل، شعركيمي اكسيره دوشدوم
یک پاسخ
چوخ گوزلدي . ساغ اولون